Si e vlerësojnë OJQ-të transparencën e përzgjedhjes së Kryeprokurorit?

PRISHTINË — Instituti i Kosovës për Drejtësi (IKD), Instituti Demokratik i Kosovës (KDI) dhe Lëvizja FOL kanë vlerësuar procesin aktual të përzgjedhjes së Kryeprokurorit të Shtetit si transparent dhe meritokratik. Në një komunikatë të përbashkët, organizatat theksojnë se kanë monitoruar të gjitha fazat kryesore, duke përfshirë miratimin e rregullativës dhe intervistimin e pesë kandidatëve.

Sipas tyre, Këshilli Prokurorial i Kosovës (KPK) ka adresuar mangësitë e procesit të kaluar, duke harmonizuar procedurat me legjislacionin në fuqi. Ndryshimet në rregullore kanë qartësuar kompetencat dhe eliminuar paqartësitë, ndërsa publikimi i konceptdokumenteve të kandidatëve ka rritur transparencën.

Gjatë verifikimit të kandidaturave, nuk janë evidentuar probleme përmbajtësore, dhe të pesë kandidatët kanë plotësuar kriteret ligjore. Procesi i hartimit të pyetjeve standarde është incizuar me audio dhe video, ndërsa monitoruesit nuk kanë vërejtur komunikim të dyshimtë ndërmjet anëtarëve të Panelit Vlerësues.

Intervistat janë zhvilluar në kushte të barabarta: kandidatët kanë marrë pyetjet e njëjta, kohë të barabartë për përgjigje dhe janë vlerësuar menjëherë. Dallimi në pikë mes tyre është i vogël, prandaj OJQ-të kërkojnë që fazat e mbetura të zhvillohen me transparencë dhe në përputhje me parimet e ligjshmërisë.

Koalicioni do të vazhdojë monitorimin deri në përfundim, ndërsa raporti përfundimtar do të publikohet pas mbylljes së procesit.
*Burim: RTV21*
— Redaksia ZHURMA