Gashi ndërpret seancën e Kuvendit pa nisur debati për 4 ligjet e arsimit
Kryetari i Kuvendit, Afrim Gashi, ndërpreu seancën pas votimit të rendit të ditës, duke premtuar njoftim shtesë.
SHKUP — Deputetët votuan sot rendin e ditës me katër ligjet në fushën e arsimit dhe aktiviteteve hulumtuese-shkencore në seancën e 116-të të Kuvendit. Pas votimit, kryetari i Kuvendit, Afrim Gashi, e ndërpreu seancën, ndërsa për vazhdimin e saj paralajmëroi njoftim shtesë.
Në rendin e ditës janë katër propozim-ligje, të cilat Kuvendi i kishte rikthyer në rend dite. Njëri prej tyre është Propozim-ligji për ndryshimin dhe plotësimin e Ligjit për standardet studentore, me procedurë të shkurtuar; tre të tjerat janë për sigurimin e cilësisë në arsimin e lartë dhe shkencës, për veprimtarinë hulumtuese-shkencore dhe për arsimin e lartë, të tria në lexim të parë.
Deputetja Daniela Hristova, propozuese e ligjit për standardet studentore, shpjegoi se ndryshimet shtojnë kërkesa për akomodim dhe ushqim në konviktet shtetërore. „Po përcaktohet kufiri i moshës për pranim në një konvikt studentor dhe po finalizohet procedura për vendosjen e masave edukative ndaj atyre studentëve të cilët nuk i përmbahen rregullores së konviktit”, tha Hristova.
Ndryshimet kanë për qëllim siguri më të madhe dhe trajtim më të barabartë për studentët. Propozim-ligji nuk shkakton pasoja financiare ndaj buxhetit. Propozimi i deputetit Sashko Jançev për ndryshimin e ligjit për verërat nuk u pranua.
Burimet: Tetova Sot
— Redaksia ZHURMA