Kuvendi i Maqedonisë rikthen në rend dite ligjet për arsimin e lartë
Fronti Evropian akuzon kryeparlamentarin Afrim Gashi për shkelje të rregullores, ndërsa opozita paralajmëron amendamente pas kalimit në lexim të parë.
SHKUP — Kuvendi i Maqedonisë së Veriut ka vendosur për herë të dytë në rendin e ditës të seancës plenare tri ligjet për arsimin e lartë. Edhe pse paraprakisht këto propozim-ligje u tërhoqën nën presionin e deputetëve opozitarë, të njëjtat u rikthyen vetëm sa për të konfirmuar rendin e ditës, ndërsa seanca kaloi pa asnjë debat.
Koordinatorja e Frontit Evropian, Rina Ajdari, ka shprehur vërejtje të ashpra mbi punën e Kuvendit. Ajo akuzoi kreun e institucionit, Afrim Gashi, për shkelje të përsëritura të rregullores, duke sqaruar se materialet dhe informimi i nevojshëm për seancën duhej t'u dorëzoheshin deputetëve së paku dhjetë ditë më parë.
Nga ana e tij, kryetari i Kuvendit, Afrim Gashi, ka hedhur poshtë akuzat duke argumentuar se po përpiqet të udhëheqë punën gjithmonë në bazë të rregullores. Gashi sqaroi se neni 74, paragrafi 2, u mundëson që në raste të seancave të jashtëzakonshme materialet të dorëzohen më herët.
Paraprakisht, pas një debati të ashpër në komisionin për arsim, ligjet kaluan leximin e parë. Megjithatë, deputetët ranë dakord që të zhvillohet një debat publik me pjesëmarrjen e profesorëve, ekspertëve dhe përfaqësuesve të universiteteve, ndërsa opozita ka paralajmëruar amendamente para miratimit përfundimtar.
Burim: Alsat-M
— Redaksia ZHURMA