Shqiptarët në Luginë të Preshevës votojnë për Këshillin Kombëtar Shqiptar më 8 nëntor

Gjithsej 37.759 shqiptarë të regjistruar në Listën e Veçantë Zgjedhore kanë të drejtë vote më 8 nëntor për të zgjedhur përfaqësuesit e tyre në Këshillin Kombëtar Shqiptar. Për 29 vende në këtë institucion garojnë katër lista zgjedhore me gjithsej 107 kandidatë. Procesi zhvillohet pas garimit të përbashkët të subjekteve politike shqiptare në zgjedhjet parlamentare në Serbi.

Kjo garë zgjedhore vjen pas më shumë se një dekade me një përbërje të rritur të organit përfaqësues, nga 15 në 29 anëtarë. Ky zgjerim numrik i vendeve lidhet drejtpërdrejt me rezultatet e regjistrimit të popullsisë të zhvilluar në vitin 2022 në Serbi.

Sipas renditjes zyrtare në fletëvotim, Lista nr. 1 është LPD–PDSH (Lëvizja e Progresit Demokratik) me bartës Shqiprim Musliun dhe 29 kandidatë. Lista nr. 2 është PD–LR (Partia Demokratike) me bartës Sali Salihin dhe 20 kandidatë. Lista nr. 3 përfaqësohet nga PVD–AL (Partia për Veprim Demokratik) me 29 kandidatë, ndërsa Lista nr. 4 është APN (Alternativa për Ndryshim) me bartës Levent Qazimin dhe 29 kandidatë.

E drejta e votës u takon shtetasve të Serbisë mbi 18 vjeç që janë të përfshirë në Listën e Veçantë Zgjedhore të pakicës kombëtare shqiptare. Zgjedhësit votojnë për listat e propozuara, ndërsa ndarja e mezhdeve dhe mandateve bëhet në bazë të votave të fituara. Verifikimi i regjistrimit dhe i vendvotimeve mund të kryhet përmes platformës elektronike përkatëse.

Këshilli Kombëtar Shqiptar shërben si organ i vetëqeverisjes me kompetenca në arsim, me fokus te tekstet dhe përdorimi i gjuhës shqipe në shkolla, si dhe në kulturë, informim e mbrojtjen e përdorimit zyrtar të gjuhës. Gjithashtu, institucioni funksionon si mekanizëm për ngritjen e çështjeve që prekin banorët në Preshevë, Bujanoc dhe Medvegjë, përfshirë mbrojtjen e të drejtave kolektive dhe adresimin e pasivizimit të adresave.