Hasani: Mbi 25 mijë shqiptarë kanë adresa të pasivizuara në Luginë

Në zgjedhjet parlamentare të Serbisë të mbajtura më 25 tetor, «Koalicioni Shqiptar» fitoi dy mandate në Parlamentin e Serbisë, të cilat do t'i marrin Shaip Kamberi dhe Visar Mehmeti, ndërsa mbi 25 mijë qytetarë shqiptarë në Preshevë, Medvegjë dhe Bujanoc kanë mbetur me adresa të pasivizuara, sipas të dhënave që ka ngritur veprimtari Refik Hasani.

Çështja e pasivizimit të adresave të shqiptarëve në Luginë është rikthyer fuqishëm në vëmendje pas zgjedhjeve parlamentare të 25 tetorit në Serbi, një praktikë kjo që sipas përfaqësuesve ka larguar mijëra qytetarë nga regjistrat zyrtarë dhe ka cenuar të drejtën e tyre elementare për të votuar, duke ndikuar rëndë në përfaqësimin politik të pakicës shqiptare në institucionet qendrore të vendit.

Veprimtari Refik Hasani ka folur mbi përgjegjësinë që kanë deputetët e rinj për të adresuar këtë problematikë, duke vlerësuar se unifikimi i shqiptarëve në një listë të përbashkët përmes «Koalicionit Shqiptar» ishte një hap i rëndësishëm, megjithëse rezultati përfundimtar i shpallur nga Komisioni Republikan i Zgjedhjeve nuk ishte ai që pritej nga elektorati. Hasani ka deklaruar se pasivizimi i adresave përmes ushtrimit shtetëror sistematik përbën një formë të spastrimit etnik dhe diskriminimit, ku janë hequr votuesit me të drejtë vote edhe nga regjistrat e votuesve. Sipas tij, si pasojë e fshirjes së adresave janë krijuar pasoja të rënda administrative, demografike dhe politike për shqiptarët etnikë dhe autoktonë në Serbi. Veprimtari ka theksuar se kjo praktikë ka pasur ndikim të drejtpërdrejtë në zgjedhjet e 25 tetorit, pasi së paku dy deputetë të tjerë nuk arritën të merrnin votat e nevojshme për shkak se shqiptarët e pasivizuar ishin hequr nga regjistrat e votuesve, duke sjellë kështu më pak votues me të drejtë vote. Përmes veprimeve administrative sistematike, sipas Hasanit, po tjetërsohet struktura demografike dhe elektorale në Krahinën e Preshevës, Medvegjës dhe Bujanocit, ndërsa ai pretendon se çdo i katërt shtetas shqiptar i Serbisë nga këto tri komuna është i prekur dhe bëhet fjalë për mbi 25 mijë qytetarë. Ai ka përmendur gjithashtu Ligjin mbi vendbanimin dhe vendqëndrimin, të publikuar në «Gazetën Zyrtare të RS», nr. 87/2011, duke theksuar se ai po zbatohet në mënyrë selektive dhe diskriminuese ndaj shqiptarëve.

Për sa i përket hapave të ardhshëm, Hasani u ka kërkuar dy deputetëve të «Koalicionit Shqiptar», Shaip Kamberi dhe Visar Mehmeti, që çështjen e pasivizimit ta bëjnë një nga përparësitë e para të mandatit të tyre. Ai ka kërkuar që që në seancat e para të legjislaturës së re të paraqiten pyetje parlamentare me shkrim dhe interpelancë për të kërkuar sqarime dhe llogaridhënie nga kryeministri dhe ministria përkatëse. Këta mekanizma, sipas tij, duhet të shërbejnë për të përcaktuar numrin e saktë të personave me adresa të pasivizuara në gjithë Serbinë dhe për të krahasuar gjendjen e shqiptarëve me atë të nacionaliteteve të tjera joshqiptare në komunat e vendit. Po ashtu, ai kërkon ngritjen e një komisioni të ngarkuar me hetimin e pasivizimit, ndërprerjen e menjëhershme të këtyre praktikave, hetime të pavarura e transparente dhe rikthimin e adresave të shqiptarëve. Ndërkohë, sa i përket Qeverisë së re të Republikës së Serbisë, Hasani ka vlerësuar se ajo duhet të garantojë procedura administrative transparente dhe të kontrollueshme, të ndryshojë narrativën e ndjekur nga pushteti i Aleksandër Vuçiqit, si dhe t'i nënshtrojë këto praktika një shqyrtimi të plotë e të paanshëm me përfshirjen e monitorimit ndërkombëtar.

Duke folur për sfidat e reja të përfaqësimit politik, Hasani ka përmendur se zhvillimet politike dhe lëvizja studentore në Serbi ofrojnë një momentum që nuk duhet humbur për mbrojtjen e të drejtave të pakicave.