Pse Shqipëria mbetet 'sekret i ruajtur mirë' sipas medies gjermane?

TIRANË — Media gjermane Merkur.de e cilëson Shqipërinë si një nga destinacionet më tërheqëse turistike në Evropë, duke e quajtur "sekret të ruajtur mirë" për shumë vizitorë evropianë. Popullariteti i vendit po rritet me ritme të shpejta, nxitur nga bregdeti i pasur, trashëgimia kulturore dhe kuzhina autentike.

Riviera Shqiptare krahasohet shpesh me Greqinë. Ksamili qëndron në qendër të vëmendjes, i njohur për plazhet me rërë të bardhë, detin e cekët ngjyrë bruz dhe ishujt e vegjël që mund të arrihen me varkë. Himara ofron atmosferë më të qetë, ndërsa Gadishulli i Karaburunit tërheq me natyrën e egër dhe gjiret shkëmbore të paprekura.

Shenjat e rritjes janë konkrete: në vitin 2025, Shqipëria priti rreth 12,47 milionë vizitorë — një shifër e jashtëzakonshme për një vend me sipërfaqe relativisht të vogël. Edhe Shëngjini, në veri, po fiton vëmendje për plazhet e tij të gjata ranore, ende pak të njohura nga turistët gjermanë.

Larg zonave të frekuentuara, vendi vazhdon të ruajë karakterin e tij autentik. Kuzhina tradicionale mbetet një tjetër pikë e fortë: tava e kosit, e konsideruar pjatë kombëtare, si dhe byreku me djathë ose spinaq, përmenden si përvoja që nuk duhen humbur nga turistët e huaj.

Gjirokastra, pjesë e Trashëgimisë Botërore të UNESCO-s që prej vitit 2005, tërheq me rrugicat karakteristike prej guri dhe arkitekturën tradicionale. Berati — "qyteti i një mbi një dritareve" — gëzon gjithashtu mbrojtjen e UNESCO-s, ndërsa Tirana po fiton gjithnjë e më shumë interes si qendër kulturore dhe artistike.

Me 21,5% të territorit të mbrojtur si zonë natyrore dhe me lumin Vjosë — parku i parë kombëtar i një lumi të egër në Evropë — Shqipëria po konsolidohet si destinacion për turistët që kërkojnë natyrë, kulturë dhe përvoja autentike. Lidhjet e reja ajrore, sipas raportit, pritet të nxisin rritje të mëtejshme.

Burim: ATSH
— Redaksia ZHURMA