Çfarë parashikon projektligji i Shqipërisë për Inteligjencën Artificiale?
Qeveria shqiptare ka hapur fazën e konsultimit publik për një ligj që përafron vendin me Aktin Evropian të IA-së, duke krijuar kuadër rregullator për 106 nene.
TIRANË — Qeveria shqiptare ka nisur përafrimin me Bashkimin Evropian në fushën e Inteligjencës Artificiale, duke hapur për konsultim publik projektligjin “Për Inteligjencën Artificiale” në periudhën 29 maj – 26 qershor 2026. Nisma synon të vendosë një kuadër ligjor mbi zhvillimin, vendosjen në treg dhe përdorimin e sistemeve të IA-së në Shqipëri.
Sipas relacionit shpjegues që shoqëron draftin, ky projektligj është detyrim që buron nga Kapitulli 10 i integrimit, “Transformimi Digjital dhe Media”. Mungesa e një kuadri të tillë deri më sot është vlerësuar si rrezik për pasiguri juridike dhe cenim të të dhënave personale.
Drafti është hartuar në përputhje me Rregulloren (BE) 2024/1689 (AI Act) dhe përfshin 9 krerë, 106 nene dhe 13 anekse. Dokumenti argumenton se “zhvillimi i shpejtë i sistemeve të inteligjencës artificiale ka krijuar nevojën për një kuadër të posaçëm ligjor që garanton përdorimin e sigurt, transparent dhe të përgjegjshëm”.
Një nga shtyllat kryesore është klasifikimi i sistemeve të IA-së sipas nivelit të rrezikut. Ligji parashikon ndalimin e praktikave të papranueshme dhe kërkesa strikte për sistemet me “rrezik të lartë”, si dhe krijimin e “sandbox-eve rregullatore” për inovacion të kontrolluar. Agjencia Kombëtare e Shoqërisë së Informacionit (AKSHI) do të shërbejë si autoritet koordinues, me përfshirje të autoriteteve të tregut dhe Komisionerit për të Drejtën e Informimit dhe Mbrojtjen e të Dhënave Personale.
Konsultimi do të zhvillohet përmes platformës e-konsultimi dhe takimeve publike, pa efekte financiare shtesë për buxhetin e shtetit. Sugjerimet dorëzohen deri në fund të qershorit, para miratimit në Këshillin e Ministrave.
Burim: RTV21
— Redaksia ZHURMA