Rregullorja ndalon Inteligjencën Artificiale për 28 artistët e RTSH

Edicioni i 65-të i Festivalit të Këngës në Radio Televizionin Shqiptar ka përcaktuar rregulla të rrepta për 28 artistët pjesëmarrës, duke ndaluar kategorisht përdorimin e Inteligjencës Artificiale në çdo etapë të krijimit të këngës dhe duke i dhënë përparësi krijimtarisë njerëzore. Krijimet janë krejtësisht të reja, të papublikuara më parë, të interpretuara tërësisht në gjuhën shqipe dhe nuk i kalojnë 4 minutat e kohëzgjatjes.

Këto detaje vijnë pas përmbylljes së fazës së aplikimeve dhe procesit të vlerësimit nga komisioni përkatës, ku u bënë zyrtarë 28 këngëtarët pjesëmarrës për këtë edicion jubilar, të cilët janë të moshës mbi 18 vjeç dhe garojnë me nga një projekt muzikor.