Shqipëria dhe raporti ku vetëm gjashtë bashki klasifikohen si qytet

Të dhënat e Censit dhe metodologjia DEGURBA janë përdorur në Raportin Përfundimtar për Reformën Administrativo-Territoriale 2.0 për të shfaqur tablo të ndryshme të vendbanimeve. Kamza kryeson si bashkia me shkallën më të lartë të urbanizimit, ku 99% e banorëve jetojnë në zona të tilla, ndjekur nga Tirana me 93,2% dhe Durrësi me 84,5%. Vlerat e larta vijojnë gjithashtu në Vlorë me 81%, Sarandë me 78,6%, Gjirokastër me 76,4%, Korçë me 76,1% dhe Shkodër me 74,2%. Ndërkohë, Berati, Kuçova dhe Elbasani kalojnë pragun prej 70%, kurse Vora shënon 64%, Shijaku 62,6% dhe Pogradeci 59,1%.

Në krahun tjetër, mjaft bashki nuk arrijnë të plotësojnë standardet ndërkombëtare për bërthamat urbane prej rreth 5 mijë banorësh. Për këtë arsye, zona si Himara, Përmeti, Tepelena, Delvina, Konispoli, Selenica, Divjaka, Mirdita, Puka, Fushë-Arrëza, Tropoja dhe Hasi shfaqin norma shumë të ulëta ose zero. Raporti sqaron se mungesa e një bërthame të tillë nuk nënkupton mungesë të qendrave administrative apo qyteteve tradicionale, duke sjellë rastin e Himarës e cila pavarësisht profilit turistik nuk përbën një grupim të lidhur me madhësinë e kërkuar.