Hekurudha Durrës-Rrogozhinë merr 121 milionë euro për Korridorin VIII

TIRANË — Shqipëria po merr një rol strategjik në Evropë, si hallkë kyçe e Korridorit VIII që lidh Adriatikun me Detin e Zi. Sipas gazetës italiane 'Il Sole 24 Ore', vendi nuk është më thjesht tranzit, por nyje që bashkon energjinë, logjistikën dhe sigurinë.

Në këtë sistem të ri, Porti i Durrësit zë vendin më të rëndësishëm si porta perëndimore e korridorit. Rëndësia e tij nuk lidhet vetëm me funksionin tregtar, por me aftësinë për të bashkuar transportin detar italian me rrjetet tokësore drejt Ballkanit Lindor.

Një rëndësi të veçantë ka modernizimi i linjës hekurudhore Durrës–Rrogozhinë prej 34 kilometrash. Projekti financohet nga Bashkimi Evropian, Banka Evropiane e Investimeve dhe BERZH me grant e kredi që kapin vlerën totale prej 121 milionë eurosh, duke u ndërtuar sipas standardeve evropiane.

Pas Deklaratës së Tiranës në shkurt 2026, Korridori VIII ka marrë një funksion të dyfishtë, civil dhe ushtarak. Kjo do të thotë se infrastruktura shqiptare duhet të mbështesë edhe transportin e shpejtë të forcave të NATO-s në raste krizash apo emergjencash.

Për Italinë, siguria industriale nuk mbaron në Pulia ose Abruco, por shtrihet përmes Ballkanit. Lidhja e energjisë elektrike Itali-Mali i Zi dhe Korridori VIII janë projekte të integruara, ku furnizimi i qëndrueshëm mbështet rrjetet e komunikimit dhe logjistikës.

Megjithatë, suksesi varet nga përfundimi i lidhjeve në pikat e tjera të rajonit. Bullgaria dhe Maqedonia e Veriut kanë nënshkruar marrëveshjen në nëntor 2025 për tunelin e Gyueshevos. Harmonizimi i standardeve dhe procedurave kufitare mbetet thelbësor për të evituar vonesat në qarkullim.

Investimet evropiane në porte dhe hekurudha mund të përshpejtojnë modernizimin e vendit, duke e kthyer Shqipërinë në qendër logjistike të Evropës Juglindore. Ky integrim do të forcojë lidhjet ekonomike me Italinë dhe do të ndihmojë përfshirjen në zinxhirët rajonalë të furnizimit.

Burim: ATSH
— Redaksia ZHURMA