Berisha: Paketa fiskale e Ramës është goditje e rëndë për më të varfrit

Kreu i Partisë Demokratike, Sali Berisha, deklaroi se paketa e re fiskale e qeverisë përbën një goditje të rëndë për më të varfrit, bizneset e vogla dhe shtresën e mesme, duke paralajmëruar se rreth 18 mijë biznese rrezikojnë falimentimin për shkak të ndryshimeve në fashën e TVSH-së.

Sipas kreut të PD-së, ndryshimet në sistemin e taksave u ndërmorën pa asnjë paralajmërim paraprak dhe pa asnjë konsultim publik. Ai shtoi se kryeministri Edi Rama ka informuar shqiptarët se buxheti do të arrijë në 10 miliardë, ndërsa KLSH ka konstatuar se një pjesë e madhe e tij zhduket, çka sjell më shumë vjedhje dhe varfërim për qytetarët.

Duke analizuar ndikimin tek qytetarët në nevojë, Berisha u shpreh se përfshirja e të gjitha dyqaneve në fashën e TVSH-së detyron bizneset të rrisin çmimet me 6 për qind, ndërsa uli TVSH-në për 52 mallra dhe e rriti për 5 mijë mallra të tjera. Sipas tij, mbi 700 mijë pensionistë dhe rreth 49 për qind e popullatës gjenden në rrezik varfërie, ndërsa çmimet në Shqipëri rriten më shumë se në çdo vend tjetër.

Kryedemokrati vuri në theks se Banka e Shqipërisë ka hedhur në treg 90 miliardë lekë dhe ka blerë 1 miliard euro për të mbrojtur lekun, por kjo sasi parash e paprodotur nga ekonomia, së bashku me narkoeurom, nxit inflacionin dhe rëndon më të varfrit. Për më tepër, ai theksoi se dyfishimi i taksës së dividendit nga 8 për qind në 15 për qind do të ketë pasoja të rënda për investimet e huaja në vend.

Sa i përket biznesit të vogël, Berisha theksoi se vendosja e nivelit më të ulët të xhiros për TVSH-në godet fatalisht rreth 18 mijë subjekte, të cilat detyrohen të rrisin çmimet dhe rrezikojnë falimentimin, duke nxitur emigracionin. Ndërkaq, shtresa e mesme që përfshin profesionet e lira, ekspertët dhe stomatologët, po ashtu goditet përmes aplikimit të TVSH-së prej 21 për qind, duke gjobitur qytetarët dhe dërguar shërbimet drejt shtrenjtimit.

«Dyfishimi i taksës së dividentit do ketë pasoja të rënda për investimet e huaja», tha kreu i PD gjatë një komunikimi me qytetarët në rrjetet sociale.

«Në qoftë se Edi Rama donte të lehtësonte vërtet qytetarët nga taksat e ushqimeve, të vendoste mekanizmin e kompensimit të plotë të çdo kilogrami, të çdo grami që blihet në dyqane në kuadrin e 52 mallrave që ka shpallur se iu ul TVSH-në», deklaroi ndër të tjera Berisha.