Policia e Ohrit shpëton dy vajza 2.000 metra larg bregut
Vajzat 18 dhe 19-vjeçare po lundronin me dërrasa SUP kur u shtynë dy mijë metra larg bregut për shkak të erës së fortë dhe dallgëve.
Redaksia ZHURMA · · Përditësuar · 1 min lexim
OHËR — Policia liqenore e Ohrit ka shpëtuar dy vajza të reja të cilat po largoheshin në mënyrë të pakontrolluar drejt thellësisë së liqenit. Ngjarja ndodhi mbrëmjen e së martës përballë autokampit të qytetit, ku erërat e forta dhe dallgët e larta pamundësuan kthimin e tyre në breg.
Sipas njoftimit zyrtar nga MPB Maqedoni, alarmi u dha rreth orës 19:55, kur u raportua se dy personat po kërkonin ndihmë duke bërtitur. Ato ishin duke lundruar me dërrasa SUP rreth 1.000 metra larg bregut përpara se të humbnin kontrollin mbi drejtimin e lëvizjes.
Nëpunësit policorë të policisë liqenore reaguan menjëherë duke u nisur me varkat e tyre dhe i gjetën vajzat rreth 2.000 metra larg tokës. Policia identifikoi të shpëtuarat si E.S. 19 vjeçe dhe I.A. 18 vjeçe, të dyja banuese në Ohër, të cilat u shoqëruan të sigurta në stacion.
Pas këtij incidenti, SPB Ohër dhe policia liqenore u bëjnë thirrje notarëve dhe përdoruesve të dërrasave SUP apo barkave me pedale që të mos largohen nga zonat e sigurisë. Respektimi i masave mbetet thelbësor për të parandaluar rreziqet në ujë.
Burim: Tetova Sot
— Redaksia ZHURMA
