Toshkovski: Safe City shtrihet në Bllacë, priten 10 milionë euro gjoba në vit

Sistemi për mbikqyrjen e trafikut i njohur si Safe City do të shtrihet plotësisht në mbarë vendin deri në muajin shkurt, ndërsa Ministria e Punëve të Brendshme llogarit të arkëtojë rreth 10 milionë euro në vit nga gjobat e trafikut, siç bëri të ditur ministri Pançe Toshkovski. Sipas projeksioneve të paraqitura nga ministri, një e katërta e këtyre të ardhurave do t'i rikthehen drejtpërdrejt buxhetit të policisë për t'u riinvestuar në avancimin e mëtutjeshëm të sistemit dhe në sigurinë rrugore.

Siç raportoi Zhurma më 10 nëntor 2026, ministri i Punëve të Brendshme, Pançe Toshkovski, kishte njoftuar më parë se edhe zyrtarët e lartë dhe ministrat po ndëshkohen nga rrjeti i kamerave në trafik.

Zgjerimi i këtij rrjeti do të nisë në Strumicë ku zbatimi zyrtar hapet në javën e parë të dhjetorit, kurse në Shtip aktivitetet mbyllen brenda këtij viti, përpara se radha t'i vijojë Manastirit, ndërkohë që pajisje speciale do të vendosen edhe në pikën kufitare të Bllacës. Përveç kamerave fikse, ministri Toshkovski sqaroi se analiza e ekspertëve ka treguar nevojën e radarëve mobilë dhe pajisjes së automjeteve policore me sisteme që matin shpejtësinë e të tjerëve në lëvizje, sepse drejtuesit ngadalësojnë vetëm para kamerave fikse. Për të shmangur vonesat në kufi, në Bllacë janë planifikuar kabina pagese për targat e huaja, ndërsa shoferëve u rekomandohet shkarkimi i aplikacionit për kontrollin e shkeljeve.

Përveç zhvillimeve vendase, projekti mori vëmendje ndërkombëtare pasi fitoi vendin e parë për ekselencë në sigurinë rrugore në Samitin Botëror të Policisë në Dubai, duke lënë prapa shtete si Singapori apo Abu Dabi mes më shumë se 700 nominimeve. Ministri theksoi rëndësinë e këtij suksesi dhe rikujtoi se fillimisht pati dyshime rreth jetësimit të këtij projekti.

«Kur e filluam projektin „Safe City“, shumëkush dyshonte se më në fund do të funksiononte sistemi për të cilin flitej prej vitesh. Sot kam nderin t'ju njoftoj se deri ku kemi arritur në këtë plan», u shpreh Toshkovski, duke shtuar sellogaritë e të ardhurave përbëjnë vlerësime fillestare dhe se qëllimi kryesor mbetet parandalimi dhe siguria.