Hapet fushata në GoFundMe për riatdhesimin e trupit të artistes Rinesa Qeriqi

Në platformën GoFundMe është hapur një fushatë për mbledhjen e donacioneve me qëllim mbulimin e shpenzimeve për riatdhesimin e trupit të artistes Rinesa Qeriqi, e cila u nda nga jeta në moshën 25-vjeçare në Kanada. Nisma është ndërmarrë nga Shoqata Shqiptare e Rajonit Waterloo, me synim që familja e saj t'i japë lamtumirën e fundit në Kosovë.

Siç raportoi Zhurma më 23 tetor 2026, artistja kosovare Rinesa Qeriqi u nda nga jeta në moshë të re, pas njoftimeve të bëra publike nga familjarët e saj përmes një mesazhi prekës.

Fushata e nisur në GoFundMe synon mbledhjen e mjeteve të nevojshme financiare për të mbuluar shpenzimet e transportit dhe procedurat zyrtare që lidhen me riatdhesimin, njoftuan organizatorët. Artistja e njohur me emrin skenik Rinesance ndërroi jetë më 23 tetor, pas një përballjeje me një tumor agresiv në tru (diffuse midline glioma) i cili i ishte diagnostikuar në prill të vitit 2025, bëri të ditur shoqata. E lindur dhe e rritur në Kosovë, Rinesa ishte shpërngulur në Kanada bashkë me familjen e saj në vitin 2018, por frymëzimi artistik dhe lidhja e saj mbetën gjithmonë të forta me mëmëdheun, sipas njoftimit të komunitetit. Në momentet e fundit të jetës pranë saj ishin babai Driton, nëna Shpresa, motrat Drenisa e Buna, si dhe vëllai Fron, pasi muajt e fundit i kishte kaluar në rehabilitim.

Me anë të këtij aksioni humanitar, familja planifikon ta riatdhesojë trupin e Rinesës në vendlindje, në mënyrë që ajo të prehet në atdhe pranë miqve dhe të afërmve të saj.

Shoqata Shqiptare e Rajonit Waterloo u bëri thirrje të gjithë shqiptarëve dhe njerëzve vullnetmirë që të kontribuojnë. Përmes një komunikate, shoqata deklaroi: «Nderojmë Rinesa Qeriqin me riatdhesimin e saj! Më 23 tetor 2026, e dashura jonë Rinesa Qeriqi u nda nga jeta në moshën e re 25-vjeçare, me familjen pranë saj: babanë, Driton, nënën, Shpresa, motrat, Drenisa dhe Buna dhe villain, Fronin.» Më tej, organizata shtoi se trashëgimia e artistes do të jetojë përmes kujtimeve dhe muzikës që la pas, duke thënë: «Çdo kontribut, pavarësisht shumës, do të ndihmojë që ne t’i japim Rinesës një lamtumirë të denjë e plot dashuri dhe familjes së saj ndihme e support për të përballuar fatkeqsinë.»