Senati i SHBA-së konfirmon Eric Wendt ambasador në Shqipëri

UASHINGTON — Senati i Shteteve të Bashkuara konfirmoi të mërkurën Eric Wendt ambasador të ri në Shqipëri. Kandidatura u miratua me 50 vota pro e 44 kundër në seancë plenare, pasi më herët kishte marrë mbështetjen e Komitetit për Marrëdhëniet me Jashtë të Senatit.

Mocioni për kalimin në seancë ekzekutive për shqyrtimin e emërimit, sipas Rezolutës 817 të Senatit, u miratua me votim me zë. Pas miratimit, emërimi pritet të formalizohet me firmën e Presidentit Donald Trump — hapi përfundimtar i procedurës. Më pas, Wendt pritet të udhëtojë drejt Tiranës për të marrë detyrën.

Mandati i tij nis zyrtarisht pas dorëzimit të letrave kredenciale Presidentit të Republikës së Shqipërisë, ceremoni protokollare që shënon fillimin e plotë të misionit. Wendt vjen si pasues i ambasadores Yuri Kim, e cila përfundoi mandatin në qershor 2023. Që prej largimit të saj, Ambasada në Tiranë është drejtuar nga të ngarkuar me punë.

Administrata e ish-presidentit Joe Biden kishte propozuar më herët diplomatin David J. Kostelancik për këtë post, por kandidatura e tij nuk arriti të finalizohej në Senat. Konfirmimi i Wendt i jep fund tre viteve pa ambasador të konfirmuar në Tiranë.

Eric P. Wendt është oficer i lartë i ushtrisë amerikane në pension, me mbi 34 vite shërbim, pjesa më e madhe në forcat speciale "Green Beret". Ka shërbyer si komandant i Komandës së Operacioneve Speciale të NATO-s dhe koordinator sigurie i SHBA-së për Autoritetin Izraelito-Palestinez (2017–2019), si dhe shef shtabi në Komandën e Paqësorit.

Wendt është diplomuar në Universitetin e Kalifornisë, Santa Barbara, dhe ka studime pasuniversitare për siguri kombëtare në Naval Postgraduate School. Ai flet disa gjuhë, përfshirë arabishten dhe koreanishten. Më herët ishte propozuar edhe për postin e ambasadorit në Katar gjatë mandatit të parë të Trump, por Senati nuk e konfirmoi.

Burim: Almakos
— Redaksia ZHURMA