Pse kundërshton Saliu ligjin e ri për përfaqësim të drejtë?

SHKUP — Prof.dr. Argëtim Saliu ka kundërshtuar hapur Ligjin për përfaqësim të drejtë në debatin e Komisionit parlamentar për Sistem Politik, duke e cilësuar të mangët dhe që nuk e garanton përfaqësimin e drejtë.

Saliu mbrojti me forcë Balancuesin, mekanizëm që qeveria e ka shfuqizuar. “Balancuesi paraqet një mjet teknik-administrativ për zbatimin e parimit të përfaqësimit adekuat”, tha ai. Sipas tij, të gjitha punësimet janë realizuar përmes këtij mekanizmi, duke respektuar kriteret ligjore të nenit 31 të Ligjit për nëpunësit administrativë.

Problemi kryesor, sipas Saliut, nuk është Balancuesi, por zëvendësimi i tij me një strukturë të paqartë. Ai shtroi pyetjen: “Cila është arsyeshmëria e formimit të një Trupi të ri koordinues, kur tashmë ekziston një kornizë ligjore që e rregullon këtë çështje?”

Neni 6 i propozim-ligjit shqetësoi veçanërisht akademikun. Deklarimi vullnetar i përkatësisë etnike, sipas tij, “nuk siguron mjaftueshëm siguri juridike dhe lë hapësirë për interpretime të ndryshme dhe keqpërdorime të mundshme”. Kushtetuta e Maqedonisë së Veriut njeh karakterin multietnik të shtetit.

Saliu kërkoi mekanizma ndëshkues të qartë. “Sinqerisht, nuk besoj se si shoqëri kemi arritur nivelin e kulturës institucionale ku ligjet do të respektohen pa mekanizma ndëshkues”, tha ai. Si shembull solli Ligjin për Sigurinë në Komunikacion dhe sistemin “Safe City”.

Avokati i Popullit, sipas nenit 29 të ligjit të tij, tashmë monitoron parimin e përfaqësimit. Saliu pyeti pse nuk forcohet ky rol, por krijohet një mekanizëm i ri paralel. “Nevojitet forcimi i mekanizmave ekzistues”, theksoi ai, “duke shmangur kështu dyfishimin e kompetencave”.

Qëndrimi i Saliut vë në pah një tension: qeveria heq një mekanizëm teknike, por zëvendësimi i tij duket më i dobët në sanksione dhe më i paqartë në kompetenca. Pa forcë detyruese, parimi multietnik rrezikon të mbetet deklarativ.

Burim: Almakos
— Redaksia ZHURMA