GT/FX, kamioneta Ford F-100 me 800 kuaj-fuqi që kërkoi 15 mijë orë punë

Kompania amerikane Fat Fender Garage, me seli në Arizona, ka prezantuar në panairin SEMA në Las Vegas një model të modifikuar thellësisht të njohur si GT/FX. Bëhet fjalë për një kamionetë Ford F-100 të vitit 1956, e cila kombinon estetikën klasike me karakterin dhe performancën e një Ford Mustang GT modern. Për realizimin e këtij projekti u deshën më shumë se 15 mijë orë punë, duke përfshirë fazën e projektimit, punën inxhinierike dhe prodhimin e komponentëve të personalizuar.

Nën kapak ndodhet një motor V8 Ford Coyote 5.0 litra i gjeneratës së tretë, i pajisur me një supermbushës Whipple 3.0 litra që zhvillon 800 kuaj-fuqi dhe 750 çift rrotullues. Ky motor shoqërohet nga një transmision automatik Ford 10R80 me 10 shpejtësi dhe një sistem shkarkimi prej tre inçësh me marmita Borla XR-1 Raceline, rezonatorë JMD dhe valvula elektrike. Sipas kompanisë, baza e modelit është shasia FF1 Performance Coilover Chassis, e cila synon t'i sigurojë kamionetei sjellje në drejtim të ngjashme me një supermakinë moderne, duke përfshirë pezullim të përmirësuar, rrota HRE dhe goma Toyo Proxes Sport 2.

Karroceria prej çeliku ka kaluar në ndërhyrje të gjera me dorë, ku çatia dhe kapaku i motorit janë rrafshuar, kabina është ulur me dy inç dhe parafangot janë zgjeruar. Pjesa e jashtme përfshin bojë të personalizuar BASF, elementë të veshur me Cerakote, si dhe një difuzor të përshtatur nga Ford Mustang Shelby GT350, ndërsa grila origjinale ka mbetur i vetmi element i pandryshuar. Kabina e zezë është rindërtuar tërësisht me lëkurë cilësore, ulëse sportive, tregues modernë dhe mekanizma të personalizuar për dyert.