Sa vjet do të punojnë maqedonasit për të dalë në pension?
Pse Qeveria e Maqedonisë së Veriut po shqyrton rritjen e moshës së pensionimit deri në 73 vjeç?
SHKUP — Ministria e Financave e Maqedonisë së Veriut ka njoftuar se nuk është marrë vendim përfundimtar për reformën e sistemit pensional, por analizat e Fondit Monetar Ndërkombëtar (FMN) dhe Bankës Botërore mund të çojnë në rritjen e moshës së pensionimit deri në 73 vjeç.
Ministrja e Financave, Gordana Dimitrieska-Koçoska, tha se institucionet financiare do të bëjnë një analizë të detajuar të qëndrueshmërisë afatgjatë të shtyllave të para dhe të dytë të pensioneve. Megjithatë, ajo theksoi se Qeveria nuk do t’i pranojë automatikisht rekomandimet.
Dimitrieska-Koçoska paralajmëroi se një nga opsionet që mund të dalë nga analizat është rritja e moshës së pensionimit, por për momentin kjo mbetet vetëm një mundësi. Ajo propozoi një qasje më fleksibile, ku qytetarët që dëshirojnë të punojnë më gjatë të kenë këtë të drejtë, ndërsa të tjerët të pensionohen sipas kushteve aktuale.
Sipas ministrës, sfida kryesore mbetet situata demografike: plakja e popullsisë dhe ulja e numrit të qytetarëve në moshë pune kërcënojnë qëndrueshmërinë e fondit pensional. Kjo problematikë prek shumicën e vendeve evropiane, por në Maqedoninë e Veriut situata mund të bëhet akute nëse nuk ndërmerren masa.
Burim: Almakos
— Redaksia ZHURMA