Si do të luftojnë zjarret në pyjet e Maqedonisë e Veriut?

— Qendra e Menaxhimit të Krizave (QMK) ka nisur një projekt pilot për instalimin e kamerave të mençura për zbulimin e hershëm të zjarreve në pyjet e Maqedonisë së Veriut. Këto pajisje moderne do të vendosen në zona kritike dhe do të jenë nën mbikëqyrje të vazhdueshme 24-orëshe nga Qendra Operative e QMK-së.

Sistemi aktual po zgjerohet drejt një rrjeti prej rreth 50 kamerash, gjë që do të rrisë ndjeshëm mbulimin e zonave më të rrezikuara. Drejtori i QMK-së, Muhamed Ali, deklaron se qëllimi kryesor është zbulimi në kohë i zjarreve për të mundësuar një reagim më të shpejtë dhe koordinim më efikas në terren.

Teknologjia e përdorur përfshin kamera me rrotullim 360 gradë që monitorojnë vazhdimisht ambientin. Këto pajisje drejtohen dhe ndalojnë automatikisht në vendndodhjen e saktë sapo detektojnë tym ose flakë, duke dërguar njoftime të menjëhershme përmes email-it dhe mesazheve në Qendrën Operative të QMK-së.

Muhamed Ali thekson se krijimi i këtij sistemi ka qenë një nga prioritetet e tij që nga marrja e pozicionit drejtues. Implementimi është realizuar në bashkëpunim me një kompani vendase, me qëllimin që të ofrohet mbrojtje më e madhe për pyjet, pronën dhe sigurinë e qytetarëve.

QMK-ja vlerëson se ky projekt hap një kapitull të ri në sistemin kombëtar të mbrojtjes, ku teknologjia moderne shihet si çelësi i veprimit efikas. Ky investim vjen pas një historie të vështirë me zjarret që kanë goditur vendin në vitet e fundit.

Vetëm gjatë gushtit dhe shtatorit e vitit të kaluar, u raportuan zjarre në depoinë e Drisllës, në fshatin Kuklish në Strumicë, në Dellçevë, në Krushevë dhe në Vardarishtë në komunën Gazi Babë, gjë që kulmoi me zjarrin në Trubarevë.

Burim: Portalb
— Redaksia ZHURMA