Sa persona u privuan nga liria për drogë në Maqedoni?
Operacioni policor gjatë 24 orëve të fundit solli 23 arrestime dhe konfiskime droge në 10 qytete të Maqedonisë.
SHKUP — Ministria e Punëve të Brendshme njoftoi se gjatë 24 orëve të fundit, policia arrestoi 23 persona në 10 qytete të Maqedonisë për posedim të drogës. Në Shkup u arrestuan shtatë persona të moshës nga 19 deri në 40 vjeç, tek të cilët policia gjeti dhe konfiskoi lëndë pluhurore të bardhë, lëndë të ngurtë të bardhë dhe marihuanë.
Në Tetovë, policia bastisi banesën e një 41-vjeçari me urdhër gjyqësor dhe sekuestroi marihuanë, ndërsa në Gostivar u arrestua një 54-vjeçar, të cilit gjatë kontrollit policor iu gjet një lëndë e ngurtë e bardhë. Në Kumanovë, dy persona u arrestuan në dy operacione të ndara, ku u gjetën marihuanë, lëndë pluhurore, një lëndë e fortë e zezë dhe tableta.
Në Kriva Pallankë, një arrestim u krye në shtëpinë e një 32-vjeçari, ku policia sekuestroi marihuanë, ndërsa në Radovish u arrestua një 42-vjeçar, tek i cili fillimisht u gjet një lëndë pluhurore e bardhë, ndërsa gjatë bastisjes në banesën e tij u sekuestrua edhe kokainë. Në rrugën rajonale ndërmjet fshatrave Dedinë dhe Konçe u arrestuan edhe dy persona nga Shkupi, pasi në automjetin me të cilin udhëtonin u gjet hashash.
Sipas njoftimit të Ministrisë, pas dokumentimit të plotë të rasteve, ndaj të 23 personave të arrestuar do të parashtrohen kallëzimet përkatëse.
Burim: Almakos
— Redaksia ZHURMA
Bisedoni
Komentet janë të hapura për anëtarët e Zhurma. Llogaria është falas — krijo një ose hyr në llogarinë tënde për me e thanë mendimin.