Si ndikojnë rrjetet sociale tek rinoplastika sipas Kastratit?
Otorinolaringologu Kujtim Kastrati thotë se pacientët e rinj vijnë me foto VIP-ash, por kërkesat estetike nuk gjithmonë përputhen me anatominë.
PRISHTINË — Interesimi për rinoplastikë është rritur ndjeshëm te moshat e reja, me rrjetet sociale si nxitëse kryesore, ka thënë otorinolaringologu Kujtim Kastrati në podcastin “Shëndeti në rend të parë”.
Sipas Kastratit, pamja e personazheve të njohur, krahasimet e vazhdueshme dhe bullizimi bëjnë që të rinjtë të shohin hundën si “problem” që duhet korrigjuar. “Tek moshat e reja po ndikon shumë pjesa e rrjetit social. Po ndikon pjesa e bullizimit”, tha ai.
Kastrati tregoi se pacientët paraqiten edhe me foto VIP-ash, duke kërkuar hundë të ngjashme. “Ka raste kur pacienti vjen me një foto dhe thotë: e dua hundën time sikur ky”, u shpreh ai. Megjithatë, ai paralajmëroi se rinoplastika ndryshon formën e hundës, por jo tërësisht fytyrën apo identitetin.
Mjeku theksoi se konsultimi paraoperativ është kritik: “Duhet të jemi korrektë duke parë tiparet e fytyrës së pacientit”, sepse jo çdo kërkesë estetike mund të realizohet.
Burim: Telegrafi
— Redaksia ZHURMA