Çfarë shkakton rënien e prodhimit të energjisë në Kosovë?

PRISHTINË — Të dhënat e Agjencisë së Statistikave të Kosovës tregojnë se importi i energjisë elektrike u rrit me mbi 41 për qind krahasuar me të njëjtin muaj të vitit të kaluar, ndërsa konsumi vazhdoi të rritet. Kosova ka importuar ndjeshëm më shumë energji elektrike gjatë muajit maj 2026, ndërsa prodhimi vendor nga termocentralet ka shënuar rënie të theksuar.

Sipas statistikave të ASK-së, gjatë muajit maj 2026, Kosova importoi 422.31 GWh energji elektrike, që paraqet një rritje prej 41.29 për qind krahasuar me majin e vitit 2025, kur importi ishte 298.89 GWh. Në të njëjtën periudhë, eksporti i energjisë elektrike ishte 205.27 GWh, ose 1.58 për qind më pak se një vit më parë.

Rritja e importit vjen në një kohë kur prodhimi vendor nga termocentralet ka shënuar rënie të konsiderueshme. Në maj 2026, prodhimi bruto nga termocentralet ishte 178.48 GWh, nga 326.89 GWh në maj 2025, që përfaqëson një rënie prej 45.40 për qind, shkruan Demokracia.com.

Prodhimi i thëngjillit për muajin maj 2026 ishte rreth 301,303 mijë ton, që paraqet një rënie prej (-37.25 %), krahasuar me muajin e njëjtë të vitit të kaluar”, ka treguar ASK. Në anën tjetër, prodhimi nga hidrocentralet arriti në 49.22 GWh, duke u rritur me 51.38 për qind krahasuar me të njëjtin periudhë të vitit të kaluar.

Edhe prodhimi nga era dhe panelet solare shënoi rritje, duke arritur në 39.30 GWh, ose 8.25 për qind më shumë se në maj 2025. Megjithatë, pavarësisht rritjes së prodhimit nga burimet e ripërtëritshme, kjo nuk arriti ta kompensojë rënien e madhe të prodhimit nga termocentralet.

Si rezultat, sasia e energjisë elektrike bruto në dispozicion ishte 484.03 GWh, ose 0.41 për qind më e ulët se në majin e vitit të kaluar. Ndërkohë, konsumi i energjisë elektrike vazhdoi trendin rritës. Gjatë muajit maj 2026, konsumi arriti në 398.67 GWh, duke shënuar një rritje prej 8.88 për qind krahasuar me majin 2025, kur ishte 366.16 GWh.

Sipas sektorëve, konsumi i amvisërive u rrit në 232.42 GWh ose 12.35 për qind, sektori komercial konsumoi 102.74 GWh (5.48 për qind më shumë), industria 44.03 GWh (3.67 për qind rritje), ndërsa ndriçimi publik dhe konsumatorët e tensionit 220-110 kV shënuan rritje prej 8.44 për qind, respektivisht 11.09 për qind. Vetëm konsumi i minierave ra me 11.87 për qind, duke zbritur në 7.68 GWh.

ASk bën të ditur gjithashtu se pjesëmarrja e energjisë elektrike alternative në kuadër të konsumit të përgjithshëm ishte 22.20 për qind gjatë muajit maj. Paralelisht me zhvillimet në sektorin e energjisë, edhe prodhimi i thëngjillit pësoi rënie të ndjeshme.

Burim: Demokracia, https://demokracia.com/kosova-rriti-importin-e-energjise-me-mbi-41-prodhimi-nga-termocentralet-pesoi-renie-te-thelle/
— Redaksia ZHURMA