Rexhepi: Pushteti po e paraqet Bërvenicën si betejë mes shqiptarëve dhe maqedonasve

Gjatë seancës parlamentare për parashtrimin e pyetjeve të deputetëve, deputeti i Frontit Evropian Skender Rexhepi ka akuzuar kryeministrin Hristijan Mickoski se pushteti po përpiqet ta paraqesë komunën e Bërvenicës si një betejë ndërmjet shqiptarëve dhe maqedonasve. Sipas tij, banorët e kësaj komune jetojnë dhe bashkëjetojnë në mënyrë të ndershme ndëretnike prej dekadash, ndërsa shtoi se në Bërvenicë mbisundoi arsyeja për mbrojtjen e dinjitetit etnik kombëtar.

Rexhepi deklaroi nga foltorja e Kuvendit se beteja atje nuk është ndëretnike, por përfaqëson një përplasje mes të shtypurve dhe atyre që shtypin, mes të diskriminuarve dhe atyre që diskriminojnë. Ai gjithashtu theksoi se në këtë komunë dështoi i gjithë aparati qeveritar, duke përfshirë kryeministrin, kryetarin e Kuvendit, ministrat dhe zëvendësministrat që, sipas tij, zbarkuan atje por nuk arritën të sillnin ndryshim në favor të tyre gjatë rrethit të parë të zgjedhjeve.

Nga ana e tij, kryeministri Hristijan Mickoski hodhi poshtë akuzat, duke deklaruar se askush nga VMRO-DPMNE-ja apo koalicioni i tij nuk ka bërë thirrje për votim mbi baza etnike. Kryeministri përgjegjësinë ia adresoi Bashkimit Demokratik për Integrim, duke e akuzuar se për njëzet vite nuk ka realizuar asnjë projekt në Bërvenicë dhe se si pasojë e kësaj gjendjeje janë larguar nga vendi dhjetë mijë qytetarë, prej të cilëve nëntëdhjetë për qind ishin shqiptarë.