Gashi kërkon tejkalimin e ndarjeve etnike në zgjedhjet e Bërvenicës

Kryetari i Kuvendit Afrim Gashi deklaroi se në zgjedhjet lokale që mbahen të diellën më 1 nëntor në Bërvenicë, qytetarët duhet të zgjedhin kandidatin dhe programin më të mirë për zgjidhjen e problemeve vendore, pa dallime etnike apo partiake.

Në raundin e dytë të zgjedhjeve lokale në Bërvenicë përballen Stojanço Radiçevski nga koalicioni Maqedonia Jote i udhëhequr nga VMRO-DPMNE-ja dhe Arkin Jahiji nga koalicioni AKI.

Kreu i Kuvendit Afrim Gashi vlerësoi se te partitë politike dhe në proceset zgjedhore ende mbisundon elementi etnik, ndërsa theksoi se qytetarët kanë nevojë për zgjidhjen e çështjeve esenciale si ujësjellësi, kanalizimi dhe asfaltimi i rrugëve. Ai shtoi se duhet të ngrihet kultura politike për të tejkaluar ndarjet.

Votimi për balotazhin në Komunën e Bërvenicës zhvillohet ditën e diel, më 1 nëntor.

«Unë uroj që ne t’i tejkalojmë këto provincializma dhe të ndahemi etnikisht, sidomos kur bëhet fjalë për zgjedhjet lokale. Megjithatë, për fat të keq, ende jemi në një fazë ku te partitë politike dhe në zgjedhje, prioritet është apo shpesh mbisundon elementi etnik, pra se për kë duhet të votohet. Mendoj se sidomos kur bëhet fjalë për zgjedhjet lokale, kur qytetarët kanë nevojë të zgjidhin probleme esenciale si ujësjellësi, kanalizimi dhe asfaltimi i rrugëve, duhet të fokusohen te zgjidhja më e mirë, te programi më i mirë dhe te kandidati më i mirë. Kjo është ajo që ka rëndësi në parim. Mendoj se duhet të ngrihet kultura politike, por fatkeqësisht ende konstatoj se nuk jemi në atë nivel. Prandaj, uroj që edhe në këto zgjedhje, sikurse në të gjitha zgjedhjet, të fitojë më i miri dhe ai që u shërben të gjithë qytetarëve, pa dallim të përkatësisë partiake, etnike, religjioze etj», tha Gashi.