Ambasada ruse thotë se i ka hedhur poshtë akuzat e ASK-së

Ambasada e Federatës Ruse në Shkup ka hedhur poshtë akuzat e Agjencisë për Siguri Kombëtare se në vend është zbuluar një rrjet propagandistik në funksion të interesave ruse, ndërsa institucionet kompetente po zhvillojnë hetime lidhur me këtë çështje. Misioni diplomatik rus i ka cilësuar pretendimet si të pabazuara dhe ka kërkuar organizimin e një takimi zyrtar me përfaqësuesit e Ministrisë së Punëve të Jashtme dhe Tregtisë së Jashtme dhe të ASK-së.

Reagimi i diplomacisë ruse pason njoftimin e publikuar nga Agjencia për Siguri Kombëtare në fillim të muajit tetor, ku u bë e ditur zbulimi i një rrjeti portalesh të rreme që sipas autoriteteve përhapnin dezinformata dhe nxisnin jotolerancë etnike e kombëtare. Sipas ASK-së, hetimet kishin nisur më herët gjatë muajit shtator, ku në bashkëpunim me Ministrinë e Punëve të Brendshme dhe Prokurorinë Themelore Publike ishin ndërmarrë veprime ndaj një shtetasi maqedonas të dyshuar për lidhje me faktorë të huaj.

Sipas të dhënave të publikuara nga Agjencia për Siguri Kombëtare, gjatë kontrollit në shtëpinë e personit të dyshuar ishin sekuestruar sende që do t'i nënshtrohen ekspertizës së mëtejshme. Hetimet përfshijnë dyshime për nxitje të urrejtjes kombëtare, racore dhe fetare, zbulim të sekretit zyrtar dhe përhapje të materialeve raciste e ksenofobike nëpërmjet një sistemi kompjuterik. ASK-ja shtoi se platformat e shfrytëzuara ishin portale të klonuara me domene maqedonase, të lidhura me struktura politike rajonale proruse që synonin të pengonin proceset e integrimit evropian të vendit.

Nga ana e saj, Ambasada ruse bëri të ditur se i është drejtuar Ministrisë së Jashtme me kërkesë për takim me drejtuesit e diplomacisë dhe të ASK-së për të marrë sqarime, por pretendon se deri më tani nuk ka marrë as përgjigje ndaj notës diplomatike të dërguar. Misioni rus ka kundërshtuar përdorimin e termit aktivitete hibride proruse dhe ka vlerësuar se këto akuza mund të synojnë zhvendosjen e përgjegjësisë për vështirësitë në marrëdhëniet e Maqedonisë së Veriut me partnerët e saj në Bashkimin Evropian. Çështja mbetet objekt i shqyrtimit dhe veprimeve të mëtejshme nga ana e institucioneve vendase.