Lidhja Shqiptare akuzon ashpër kryetarin e Kuvendit, Afrim Gashi

Lidhja Shqiptare, e udhëhequr nga Ziadin Sela, ka lëshuar një reagim të ashpër ndaj deklaratave të kryetarit të Kuvendit, Afrim Gashi, lidhur me procesin zgjedhor në Komunën e Bërvenicës. Sipas këtij subjekti politik, qasja e Gashit ndaj çështjeve kombëtare shqiptare përbën një qëndrim të njëanshëm dhe të papranueshëm.

Në njoftimin e publikuar, Lidhja Shqiptare thekson se dëshira e qytetarëve për fitoren e një kandidati shqiptar në këtë komunë nuk mund të cilësohet si provincializëm. «Sot dëgjuam deklaratën më skandaloze, më të turpshme dhe më poshtëruese të një funksionari shqiptar i cili ri ulur në një kolltuk që u fitua me shumë sakrificë e gjak të derdhur», thuhet në reagim, ku Gashi kritikohet gjithashtu për qëndrimet e tij ndaj gjuhës shqipe dhe zhvillimeve politike me VMRO-së.

Organizata politike u bën thirrje qytetarëve dhe mbështetësve në Komunën e Bërvenicës që të mobilizohen masivisht dhe të lënë mënjanë dallimet politike për zgjedhjet që mbahen të dielën, duke e vlerësuar qeverisjen në këtë zonë si të drejtë legjitime për shkak të shumicës shqiptare.