Nënshkruhet marrëveshja për parkun eolik në Spille

Shqipëria ka nënshkruar marrëveshjen për ndërtimin e Parkut Eolik të Spillesë në Bashkinë e Rrogozhinës, i cili do të ketë një kapacitet të instaluar prej 72.6 megavatësh. Ministri i Infrastrukturës dhe Energjisë, Enea Karakaçi, bëri të ditur se ky projekt është gati për ndërtim dhe operimi tregtar parashikohet të nisë në tremujorin e parë të vitit 2028.

Sipas të dhënave zyrtare, ky investim vjen si rezultat i ankandit të parë për parqet eolike të zhvilluar më parë në vend, ku u përzgjodhën tri projekte nga të cilat parku i Spillesë është i parë që ka përmbushur parakushtet për nisjen e punimeve në terren. Për vite me radhë, sektori energjetik shqiptar është mbështetur kryesisht te potenciali hidroenergjetik, ndërsa tani po hidhen hapat e parë drejt shfrytëzimit konkret të energjisë së erës në territorin vendas.

Ministri Karakaçi u shpreh se marrëveshja u nënshkrua me kompaninë austriake VERBUND dhe se projekti përfshin gjithashtu marrëveshjen e shitblerjes së energjisë elektrike dhe lejen e ndërtimit. Sipas ministrit, ky hap shënon kalimin nga potenciali i erës te realizimi konkret i një parku eolik, duke kontribuar në diversifikimin e burimeve të energjisë dhe në forcimin e sigurisë energjetike të vendit. Ndërtimi i parkut pritet të sjellë përfitime për ekonominë lokale, përfshirë përmirësimin e aksesit rrugor dhe përfshirjen e nënkontraktorëve shqiptarë.

Gjatë ceremonisë, ministri Karakaçi falënderoj veçanërisht Ditmarin dhe Marinelën për besimin te procesi i ankandit dhe përkushtimin e tyre pavarësisht dyshimeve të hershme rreth elementëve të fizibilitetit. Sipas autoriteteve, ambicia mbetet që ky investim të shërbejë si pikënisje për zhvillimin e mëtejshëm të teknologjisë së energjisë së erës, ndërsa prania e kompanive ndërkombëtare dëshmon besimin te potenciali i pastër energjetik i Shqipërisë.

Ministri theksoi se objektivi kryesor është krijimi i një sistemi energjetik që kombinon burimet e ndryshme dhe garanton furnizim të sigurt për qytetarët dhe bizneset. «Për herë të parë, Shqipëria kalon nga potenciali i energjisë së erës drejt realizimit konkret të një parku eolik që do të ndërtohet në territorin e saj», u shpreh Karakaçi, duke shtuar se projekti i Spillesë përfaqëson një hap thelbësor për të ardhmen e sektorit energjetik.