Reagimet pas aktgjykimit ndaj ish-krerëve të UÇK-së

Historiani Konrad Clewing ka deklaruar se aktgjykimi i shkallës së parë ndaj ish-krerëve të UÇK-së s’e merr parasysh sa duhet strukturën e një lufte guerile. Sipas tij, gjykata vazhdon të punojë me konceptin e ndërmarrjes së përbashkët kriminale, duke rrezikuar që përgjegjësia individuale dhe ajo e grupit të shkrihen me njëra-tjetrën. Ai ka vlerësuar se vendimi nuk reflekton mjaftueshëm realitetin operacional të një force guerile që nuk mund të marrë askënd rob.

Nga ana tjetër, ambasadori i Shqipërisë në Shkup, Denion Meidani, ka reaguar duke theksuar se beson se drejtësia ende nuk është vendosur dhe se vendimi duhet të rrëzohet në procedurën e apelit. Meidani ka kujtuar vitin 1999 dhe hapjen e kufijve për refugjatët shqiptarë, duke shprehur mbështetje për Hashim Thaçin, Kadri Veselin, Rexhep Selimin, Jakup Krasniqin dhe familjet e tyre, ndërsa ka nënvizuar se procesi gjyqësor është ende në shkallën e parë dhe pritet shqyrtimi në apel.