Rama: VV le ta udhëzojë Kurtin t'i përgjigjet Prokurorisë
VV dorëzoi kallëzimin penal më 30 korrik, duke akuzuar zyrtarë të Komunës për legalizim jashtëligjor ndërtimesh përmes bisedash në Snapchat.
PRISHTINË — Kryetari i Prishtinës, Përparim Rama, iu përgjigj kallëzimit penal që Lëvizja Vetëvendosje dorëzoi të enjten, 30 korrik, në Prokurorinë Speciale të Kosovës kundër tij dhe disa anëtarëve të kabinetit të tij.
Rama tha se VV duhet ta udhëzojë Kryeministrin Albin Kurti t’i përgjigjet Prokurorisë, pasi “ka më shumë se dy vjet” që Kurti nuk i është përgjigjur ftesës për intervistim. “E para, po m’vjen mirë që më në fund po i drejtoheni Prokurorisë,” shkroi ai.
Kryetari tha se dyert e Komunës janë të hapura për organet e drejtësisë dhe se garanton “bashkëpunim të plotë” për çdo kërkesë të Prokurorisë, duke shtuar se pas vendimit të Prokurorisë do të ndërmarrë “pa asnjë hezitim” veprime ligjore ndaj kujtdo që rezulton se ka shkelur ligjin.
Kallëzimi i VV-së bazohet, sipas subjektit politik, në një sinjalizim të marrë përmes e-mailit për biseda në “Snapchat” mes një personi anonim dhe një zyrtari të lartë të Komunës, lidhur me legalizim jashtëligjor ndërtimesh në Prishtinë.
Burim: Vox Kosova
— Redaksia ZHURMA