Pse Rama publikon fotografi 'negative' të protestuesve në Tiranë?

TIRANË — Kryeministri Edi Rama ka publikuar në rrjetet sociale fotografi dhe informacione personale për aktivistë dhe pjesëmarrës në protestat kundër qeverisë, të cilat zhvillohen prej 31 ditësh në Tiranë.

Fotografitë, të paraqitura në format "negativ", shoqërohen me komente dhe referenca ndaj çështjeve gjyqësore të protestuesve. Kjo praktikë ka ngritur shqetësime tek juristë dhe aktivistë të të drejtave të njeriut, të cilët e interpretojnë si një përpjekje për të intimiduar qytetarët që kundërshtojnë qeverinë.

Erida Skëndaj, drejtoreshë ekzekutive e Komitetit Shqiptar të Helsinkit, tha se postimet e Ramës shkojnë përtej kufijve të kritikës legjitime. "Kur të dhëna publike grumbullohen, profilizohen dhe ripublikohen për të krijuar një portret negativ, hyjnë në fushën e jetës private dhe cenojnë atë," shpjegoi ajo.

Sipas Skëndajt, mbrojtja e të dhënave personale garantohet nga Kushtetuta dhe Konventa Evropiane për të Drejtat e Njeriut. Ajo theksoi se etiketimi publik i protestuesve me elementë bullizues zhvendos debatin nga idetë te personi, duke krijuar një asimetri të thellë kur kryhet nga funksionarë shtetërorë.

Gentian Sejrani, jurist dhe aktivist, argumentoi se kjo qasje cenon të drejtën për të protestuar dhe ekspozimin ndaj bullizmit për shkak të bindjeve politike. "Moralisht, Rama po inkurajon mbështetësit e tij të fyejnë dhe bullizojnë këdo që mendon ndryshe," tha ai, duke shtuar se gjuha e politikanëve ndikon drejtpërdrejt në polarizimin shoqëror.

Opozita ka reaguar ashpër ndaj këtyre postimeve. Deputetja Jorida Tabaku i cilësoi ato si pjesë të një "fushate përndjekjeje" ndaj protestuesve. "Kryeministri mbledh biografi, kërkon 'njolla' në jetën e tyre dhe i ekspozon si tabela qitjeje," shkroi Tabaku.

Skëndaj shtoi se e drejta e tubimit paqësor mbrohet nga pasoja të padrejta. "Kur përfaqësuesi më i lartë i pushtetit i veçon protestuesit dhe i vendos në një sfond publik etiketues, krijohet perceptimi i ndëshkimit simbolik të kundërshtisë," tha ajo. Komiteti Shqiptar i Helsinkit ka kërkuar informacion nga Drejtoria e Përgjithshme e Policisë për procedurat ndaj protestuesve.

Burim: Reporter.al
— Redaksia ZHURMA