Qeveria ndryshon rregullat e privatizimit — ish-pronarëve u jepen 20 ditë afat

TIRANË — Këshilli i Ministrave miratoi ndryshime në vendimin për kriteret e vlerësimit të pronës shtetërore, që privatizohet apo transformohet, dhe procedurën e shitjes. Vendimi i ndryshuar përfshin pronat e paluajtshme shtetërore, pasuritë e luajtshme, objektet e veçanta dhe asetet e ndërmarrjeve shtetërore që plotësojnë kriteret për privatizim.

Komisioni i vlerësimit ngrihet nga ministri përgjegjës për Ekonominë dhe përbëhet nga tre anëtarë: përfaqësuesi i strukturës përgjegjëse për privatizim, një ekspert vlerësues i licencuar dhe një përfaqësues i ndërmarrjes apo institucionit që administron ose zotëron pronën. Ministri mund të urdhërojë pjesëmarrjen e një audituesi apo ekspertësh të tjerë të licencuar.

Vlerësimi i objekteve bëhet nga komisioni sipas vlerës reale të tregut, në zbatim të legjislacionit në fuqi; kur çmimi i truallit nuk figuron në hartën e çmimeve, vlerësimi kryhet sipas vlerës së tregut. Përcaktimi i vlerës dhe zgjedhja e metodologjisë janë përgjegjësi e ekspertit vlerësues, ndërsa komisioni mban përgjegjësi për vlerësimin e kryer.

Para fillimit të ankandit kërkohet informacion nga Agjencia e Trajtimit të Pronës mbi vendimet e trajtimit të pronës. Për pronarët e truallit, njoftimi publikohet në faqen zyrtare të ministrisë, në mjediset e pronës shtetërore dhe në Buletinin e Njoftimeve Zyrtare, për një afat 20-ditor.

Nëse ish-pronarët nuk paraqesin dokumentacionin e kërkuar, bëhet një njoftim i dytë me një afat të ri prej 15 ditësh; nëse dokumentacioni nuk paraqitet, prona kalon për shitje me ankand. Kur objekti shitet bashkë me truallin, vlera e truallit sipas hartës i kalon drejtpërdrejt ish-pronarit.

Për objektet ndërtimore që kanë dalë në ankand jo më pak se tre herë brenda 12 muajve pa shprehje interesi, dokumentacioni dërgohet në Agjencinë e Trajtimit të Pronës si fond kompensimi fizik. Pas pagesës së plotë, drejtuesi i strukturës përgjegjëse për shitjen nënshkruan kontratën me blerësit privatë.

Nëse në dosjen e privatizimit mungon dokumentacioni, struktura përgjegjëse ka të drejtë të kërkojë informacion nga Agjencia Shtetërore e Kadastrës, Drejtoria e Përgjithshme e Arkivave ose Arkivi Shtetëror Vendor. Ndryshimet parashikojnë edhe rregulla për rastet e qirasë ose enfiteozës, duke përfshirë investimet, të drejtën e parablerjes dhe detyrimet e kontratave përkatëse.

Burim: ATSH
— Redaksia ZHURMA