Qerkezi: Na kanë humbur shpresat te Qeveria për personat e zhdukur

Ferdonije Qerkezi ka drejtuar kritika të forta ndaj Qeverisë lidhur me mungesën e rezultateve konkrete për zbardhjen e fatit të personave të zhdukur gjatë luftës në Kosovë. Gjatë një prononcimi, ajo ka theksuar se ndër vite ka marrë premtime të shumta nga përfaqësuesit e institucioneve, por sipas saj nuk është ndërmarrë asnjë hap konkret drejt gjetjes së të pagjeturve.

Duke folur për angazhimin e deritanishëm institucional, Qerkezi ka shprehur zhgënjimin e thellë për premtimet e pambajtura ndër vite. «Secili po folë fjalë të mira, por… kurrgjë hiç. Qeveria mosvet. Edhe neve na kanë hupë shpresat krejt. Më kanë dhënë premtime që do të punojnë për me i gjetë të pagjeturit», ka deklaruar ajo.