Qelaj thotë se Gjykata Speciale ka shkelur të drejtat e njeriut në Hagë

Avokati i Popullit, Naim Qelaj, ka deklaruar gjatë raportimit në Komisionin për të Drejtat e Njeriut, Barazi Gjinore dhe Peticione se Gjykata Speciale në Hagë ka shkelur të drejtat e njeriut duke dështuar të garantojë e të respektojë standardet për një gjykim të drejtë ndaj katër ish-krerëve të UÇK-së.

Më 16 shtator, Gjykata Speciale në Hagë ka shqiptuar gjithsej 81 vjet heqje lirie ndaj katër ish-drejtuesve të UÇK-së, ku Hashim Thaçi u dënua me 25 vjet, Kadri Veseli me 18 vjet, Jakup Krasniqi me 25 vjet dhe Rexhep Selimi me 13 vjet burgim. Më pas, Kuvendi i Kosovës ka miratuar më 28 shtator një deklaratë ku kundërshtohet ky aktgjykim i cilësuar si i padrejtë. Po ashtu, më 14 tetor, Qeveria e Kosovës ka marrë vendim për krijimin e Grupit Punues për hartimin dhe harmonizimin e Strategjisë Shtetërore lidhur me procedurat e apelit para Dhomave të Specializuara.

Sipas Qelajt, konstatimet e tij si Avokat i Popullit i një vendi mbështeten në një analizë dhe vlerësim të plotë të gjendjes. Ai tha se sa herë që ka ngritur shqetësime për respektimin e standardeve nuk ka marrë asnjë sqarim nga Gjykata Speciale, përveç paraqitjeve vizuale të kryetares së saj. Qelaj njoftoi gjithashtu se sa herë që ka reaguar për këtë çështje i është përgjigjur se nuk ka mandat, gjë të cilën ai e vlerësoi si të pandershme dhe ia ka bërë të ditur drejtpërdrejt kryetares Ekaterina Trendafilova gjatë një takimi të zhvilluar më 13 maj në zyrën e tij me kërkesë të saj. Ai theksoi se të drejtat e njeriut janë universale dhe askush nuk mund t'i tregojë kufijtë një institucioni të Kosovës për mbikëqyrjen e tyre. Gjithashtu, Qelaj u shpreh se reagimet e faktorit ndërkombëtar me thirrjet për të mos ndërhyrë në drejtësi janë bërë me qëllim që të shmanget transparenca mbi ngjarjet.

Pritet që veprimet e institucioneve të Kosovës të përqendrohen te puna e Grupit Punues të formuar nga Qeveria për koordinimin e Strategjisë Shtetërore në lidhje me shkallën e apelit në Dhomat e Specializuara.

Qelaj u shpreh para komisionit: «Mendoj që Dhomat e Specializuara në Hagë kanë dështuar për të garantuar respektimin e standardeve për një gjykim të drejtë. Me këtë i kanë shkelë të drejtat e njeriut. Dhe kur e thotë Avokati i Popullit i një vendi këtë fakt, nuk guxon me e thënë pa një analizë dhe pa një vlerësim të krejt situatës që ai ka mund ta bëjë.»

Ai shtoi gjithashtu: «Sa herë e kam hapur gojën, më është thënë se ‘nuk ke mandat’. Për mua kjo ka qenë e pandershme, mungesë respekti dhe këtë ia kam thënë në takimin e 13 majit që e kam pas në zyrë me kërkesë të saj. Nuk mundet askush të vijë në një institucion të Kosovës dhe të thirret si autoritet i Kosovës t’i tregoj kufijtë dhe limitet se deri ku mund të shkojë ushtrimi i kontrollit dhe mbikëqyrjes së respektimit të të drejtave të njeriut.»