28 të ndaluar në Gjilan brenda një javë për vepra penale

GJILAN — Gjatë periudhës 24–30 tetor 2026, me urdhër të Prokurorit të Shtetit në Gjilan, janë ndaluar gjithsej 28 persona për vepra të ndryshme penale, përfshirë edhe dy të mitur. Numri më i madh i ndalimeve, saktësisht 11 prej tyre, lidhet me veprën penale të dhunës në familje, ndërsa të tjerët dyshohen për kanosje, lëndim të lehtë trupor, sulm, posedim të narkotikëve, armëmbajtje pa leje dhe rrezikim të trafikut publik.

Në mesin e të ndaluarve janë dy të mitur, ku njëri dyshohet për sulm seksual, kurse tjetri për vepra që lidhen me materialet e keqpërdorimit seksual të fëmijëve. Gjatë kësaj kohe, Prokuroria ka paraqitur gjithashtu 15 kërkesa për caktimin e masës së paraburgimit ndaj 20 personave të dyshuar, duke përfshirë nëntë kërkesa për dhunë në familje dhe dy kërkesa për veprën penale të dhunimit.