Pse po kontestohet ardhja e 15 autobusëve elektrikë në Prishtinë?

PRISHTINË — Kryetari i Prishtinës, Përparim Rama, paralajmëroi ardhjen e 15 autobusëve elektrikë dhe dy tramave të rinj, të cilët i cilësoi si moderne dhe ekologjike. Nga komuna thonë se ky projekt është në kuadër të transformimit të trafikut urban, duke synuar një shërbim më efikas për qytetarët brenda një kohe të shkurtër.

Nga ana tjetër, Luftar Braha, Drejtor për Zhvillim Ekonomik, konfirmoi se 26 autobusë të operatorëve privatë janë modernizuar dhe janë në funksion. Ai shtoi se komuna është duke punuar për modernizimin e trafikut urban edhe me 30 autobusë të tjerë shtesë.

Por ky njoftim ka nxitur reagime të ashpra nga opozita lokale. Asamblisti i Lëvizjes Vetëvendosje në Prishtinë, Enver Redenica, deklaroi se kryetari ka bërë shkelje ligjore, meqenëse nuk ka asnjë informacion për kontratën, çmimin apo mënyrën se si janë siguruar këto mjete.

Përplasja është zhvendosur edhe në distancë mes kryetarit Rama dhe ministrit të Financave, Hekuran Murati. Murati theksoi se transporti publik përmes privatëve mund të bëhet, por kjo duhet të ndjekë procedurat e Ligjit për Partneritet Publiko-Privat për të parandaluar keqpërdorimin e parasë publike.

Sipas ministrit Murati, Komuna e Prishtinës nuk ka ndjekur asnjë procedurë të kërkuar ligjore. Prandaj, ai paralajmëroi se çfarëdo aranzhimi apo marrëveshjeje që është nënshkruar për këtë çështje është në kundërshtim me ligjin në fuqi.

Këto akuza nxitën reagimin e ashpër të Përparim Ramës, i cili e quajti ministrin e Financave thjesht një bllokues të kryeqytetit. Kjo përplasje tregon se modernizimi i transportit në Prishtinë po shoqërohet me përplasje të forta politike.

Burim: Zëri
— Redaksia ZHURMA