Si do ta mbulojë Kroacia boshllëkun e ushtarëve amerikanë në Kosovë?

BRUKSEL — Kroacia është e gatshme të rrisë praninë ushtarake në Kosovë për të ndihmuar në mbulimin e boshllëkut që pritet të krijohet nga tërheqja e pjesshme e forcave të ShBA-së nga Evropa. Lajmin e bëri të ditur ministri i Mbrojtjes i Kroacisë, Ivan Anushiq, në Bruksel.

Në këtë kuadër, sekretari i ri i Mbrojtjes i ShBA-së, Pete Hegseth, u bëri të qartë aleatëve evropianë se Uashingtoni po zvogëlon praninë e tij në kontinent. Ai kërkoi që evropianët të marrin më shumë përgjegjësi, duke paralajmëruar se do të monitorojë reagimet e tyre.

Ky zhvillim vjen në një kohë kur në aleancë po diskutohet plani për një reduktim të ri të ushtarëve të NATO-s në Kosovë. Sipas planeve të bëra publike nga gjenerali amerikan Alexus G. Grynkewich, prania e trupave do të zvogëlohet në të ardhmen.

Për më tepër, Sekretari i Përgjithshëm i NATO-s, Mark Rutte, sqaroi se misioni i KFOR-it do të pësojë një zbritje të ndjeshme. Nga rreth 4.700 trupa sa janë aktualisht në terren, numri do të reduktohet në nivelin e para vitit 2023, në rreth 3.000 deri në 3.500 pjesëtarë.

Ministri kroat Anushiq theksoi se Kroacia po e ndjek këtë dinamikë dhe e mbështet qëndrimin e Uashingtonit. Ai sqaroi se kritikat nuk i drejtoheshin Kroacisë dhe shtoi se për Zagrebin zyrtar, misioni i KFOR-it në Kosovë mbetet angazhimi më i rëndësishëm paqeruajtës në kuadër të aleancës.

Kroacia aktualisht ka 152 ushtarë në KFOR. Sipas vendimit të Parlamentit kroat për vitin 2026, numri i tyre mund të arrijë deri në 200 pjesëtarë. Kjo do të thotë se shtimi i trupave është i mundur ligjërisht dhe operacionalisht që këtë vit, nëse merret një vendim i tillë.

Për vitin 2027 pritet të hartohet një vendim i ri parlamentar, teksa burime jozyrtare nga Ministria konfirmojnë se Kroacia është e përqendruar te KFOR-i. Ky hap dëshmon vullnetin për të mbështetur sigurinë në rajon dhe për të kompensuar zvogëlimin e trupave amerikane në Evropë.

Burim: Klan Kosova
— Redaksia ZHURMA