Pse pezullohet për 6 muaj pa pagesë inspektori i AKRK-së?

PRISHTINË — Komisioni Disiplinor i Autoritetit të Konkurrencës së Republikës së Kosovës (AKRK) ka vendosur pezullimin nga puna pa pagesë për gjashtë muaj ndaj inspektorit hetues Shemsi Elezi.

Vendimi, i miratuar më 16 qershor 2026, konstaton shkelje të rënda disiplinore. Elezi ka refuzuar të marrë pjesë në një inspektim të përbashkët me Ministrinë e Industrisë, Ndërmarrësisë dhe Tregtisë dhe Administratën Tatimore, pavarësisht urdhrave të eprorëve.

Përveç kësaj, ai nuk ka dorëzuar raportet mujore brenda afateve dhe ka zhvilluar komunikime zyrtare jashtë zinxhirit hierarkik. Komisioni ka vlerësuar pretendimet e tij ndaj drejtuesve të AKRK-së si të pambështetura me prova.

Shkeljet përbëjnë mosrespektim të detyrave funksionale dhe të Kodit të Mirësjelljes në Shërbimin Civil, duke dëmtuar funksionimin e institucionit. Vendimi mund të ankesohet në Këshillin e Pavarur Mbikëqyrës për Shërbimin Civil brenda 30 ditësh.

Burim: Sinjali
— Redaksia ZHURMA