Pse paga mesatare 713 euro në Kosovë nuk e rrit mirëqenien?

PRISHTINË — Një analizë e publikuar nga Oda Ekonomike e Kosovës (OEK) ka zbuluar se megjithëse pagat mesatare nominale janë rritur vazhdimisht, kostot e larta të jetesës dhe inflacioni kanë gërryer fuqinë blerëse të qytetarëve.

Sipas statistikave zyrtare të Agjencisë së Statistikave të Kosovës (ASK), paga mesatare bruto u rrit nga 477 euro në 2019 në 713 euro në 2025, duke shënuar një rritje prej afro 49.5 për qind. Megjithatë, OEK thekson se mbi dy të tretat e kësaj rritjeje janë absorbuar nga shtrenjtimi i produkteve dhe shërbimeve bazë, duke bërë që përmirësimi real të jetë minimal.

Krahasimi rajonal e vendos Kosovën në fund të listës në Ballkanin Perëndimor. Serbia prin me pagën mesatare prej 1,286 euro, Bosnja e Hercegovina me 1,245 euro dhe Mali i Zi me 1,206 euro. Maqedonia e Veriut ka arritur në 1,111 euro, ndërsa Shqipëria me 860 euro e ka kaluar Kosovën, duke shënuar rritjen më të madhe rajonale prej mbi 102 për qind.

Raporti evidenton dallime të theksuara mes sektorëve. Në vitin 2025, paga mesatare në sektorin publik dhe ndërmarrjet publike arrinte në 840 euro, krahasuar me 666 euro në sektorin privat. Kjo diferencë prej 174 eurosh in favor të sektorit publik reflekton një hendek të konsiderueshëm dhe të vazhdueshëm në tregun e punës kosovar.

“Rritja e pagave ka qenë kryesisht reagim ndaj inflacionit dhe rritjes së kostos së jetesës, më shumë sesa rezultat i një përmirësimi të ndjeshëm të mirëqenies ekonomike,” citohet në raportin e OEK-së. OEK këtë tendencë e lidh me inflacionin global, mungesën e fuqisë punëtore në treg dhe presionin e vazhdueshëm për rritjen e pagës minimale në rajon.

Të dhënat e fundit të Agjencisë së Statistikave të Kosovës konfirmojnë valën e shtrenjtimit. Inflacioni vjetor në muajin maj 2026 arriti në 6.8 për qind krahasuar metë njëjtën periudhë të vitit të kaluar. Rritja më e dalluar e çmimeve u regjistrua në transport (14.1%), strehim dhe energji (13.2%), ushqime dhe pije joalkoolike (5.1%), si dhe në restorante dhe shërbime akomodimi (5.3%).

Analiza e OEK-së synon të ofrojë një pasqyrë të qartë mbi trendet e pagave, ndikimin e inflacionit dhe sfidat që lidhen me fuqinë blerëse dhe konkurrueshmërinë e tregut të punës në Kosovë. Raporti thekson se rritja nominale nuk ka sjellë përmirësim të ndjeshëm të mirëqenies ekonomike për qytetarët.

Burim: Demokracia, https://demokracia.com/raporti-i-oek-kosova-me-pagat-me-te-uleta-ne-ballkan-qytetaret-vazhdojne-ta-ndjejne-shtrenjtimin/
— Redaksia ZHURMA