Pse mbetën pa paga punonjësit e Klinikës së Fëmijëve në Shkup?
Rreth 50 punonjës të Klinikës së Fëmijëve në Shkup kanë protestuar para Ministrisë së Shëndetësisë pasi nuk kanë marrë paga që nga muaji janar.
SHKUP — Punonjësit e Klinikës Universitare për Sëmundje të Fëmijëve në Shkup, të cilët nuk kanë marrë paga që nga janari, protestuan para Ministrisë së Shëndetësisë për të kërkuar zgjidhje për statusin e punës dhe pagat e prapambetura. Zgjidhje ende nuk ka. Ata kërkuan takim me ministrin, por nuk u pranuan.
Gjatë protestës, punonjësit u ftuan në takim nga ministri i Shëndetësisë, Azir Aliu. Pas këtij takimi, ministri Aliu deklaroi për mediat se nuk mund t’u jepen pagat në mënyrë retroaktive, pasi kjo nuk lejohet nga ligji. Ai u bëri thirrje drejtorëve që të mos japin premtime pa mbulesë administrative.
Samir Nuhi, një nga punonjësit e klinikës, tha se shefja e kabinetit u kishte premtuar se do të merreshin me këtë problem, por nuk morën asnjë informacion. Nuhi shtoi se ministri u kishte thënë se janë vullnetarë, por ata nuk kanë nënshkruar asnjë dokument të tillë.
Një tjetër punonjës, Sedat Bushi, tregoi se kjo situatë e mungesës së përgjigjeve është përsëritur prej vitesh. Bushi theksoi se megjithëse ka pasur raste kur janë vonuar mjetet financiare, ata gjithmonë janë paguar në fund, por këtë herë përgjegjësia po bartet pa asnjë zgjidhje.
Ministri Aliu sqaroi se këta punonjës nuk kanë marrë pëlqim pozitiv. Buxheti fiskal që miratohet në janar nuk lejon premtime pa mbulim, andaj drejtorët nuk duhet të japin shpresa të rrejshme. Ai shtoi se në vitin 2026 janë mbuluar vetëm 28 punësime të reja — shumë më pak se 50 të mbeturit.
Drejtori i klinikës, Rexhep Memedi, deklaroi se institucioni u përball me mungesë stafi në fund të vitit 2025. Për këtë arsye, me pëlqim të Financave, u angazhua personel me kontratë në vepër, por në prill 2026 erdhi përgjigja negative për mosvazhdimin e kontratave të tyre nga ky dikaster.
Aktualisht, rreth 50 punonjës kanë mbetur pa kontrata pune dhe pa paga në këtë klinikë, duke bërë që shumica prej tyre të mos shkojnë më në punë. Për një institucion që tashmë vuante nga mungesa e personelit, kjo ndërprerje rrezikon të bllokojë shërbimet elementare.
Burim: TV21
— Redaksia ZHURMA