Pse gjyqtarët e Speciales shtyjnë vendimin për krerët e UÇK-së?

HAGË — Gjyqtarët e Dhomave të Specializuara në Hagë kanë kërkuar afat shtesë deri më 20 korrik për të shpallur vendimin në rastin e krerëve të UÇK-së, duke e arsyetuar këtë me volumet e mëdha të provave dhe kompleksitetin e çështjes.

Në dokumentin e Speciales, gjyqtarët përmendin 270 dëshmitarë, rreth 5.500 prova materiale dhe gati 30.000 faqe transkripte. "Paneli vëren se mori dëshminë e afërsisht 270 dëshmitarëve dhe pranoi 5.497 prova," thuhet në vendim, duke shtuar se transkriptet e procedurave arrijnë në 29.238 faqe.

Kompleksiteti i çështjes, sipas gjyqtarëve, lidhet me faktin se akuzat mbulojnë më shumë se një vit e gjysmë dhe përfshijnë vende të shumta të dyshuara për krime. Ata argumentojnë se koha shtesë është e nevojshme për të siguruar një vlerësim të plotë dhe të drejtë të provave, si dhe për të hartuar një mendim të arsyetuar.

Megjithatë, gjyqtarët pranojnë se të akuzuarit kanë të drejtë për një vendim në kohë të shpejtë, pasi kanë kaluar tashmë periudha të gjata në paraburgim. "Paneli është i vetëdijshëm për kohën që të Akuzuarit kanë kaluar në paraburgim dhe për nevojën që procedurat të vazhdojnë sa më shpejt," thuhet në vendim, duke shtuar se zgjatja prej 60 ditësh nuk dëmton të akuzuarit.

Kjo shtyrje, megjithatë, është interpretuar në Kosovë si vendim politik, veçanërisht për shkak të afrimit të zgjedhjeve. Gjyqtarët theksojnë se mund të kërkojnë afate shtesë vetëm nëse është absolutisht e nevojshme.
Burim: Nacionale
— Redaksia ZHURMA