Pse Azir Aliu kërkon largimin e kazinove nga shkollat?
Ministri i Shëndetësisë mbështet propozim-ligjin e ri që synon distancimin e kazinove nga shkollat dhe reduktimin e reklamave për të luftuar varësinë.
SHKUP — Ministri i Shëndetësisë, Azir Aliu, ka deklaruar mbështetjen e tij për Propozim-ligjin për lojërat e fatit dhe lojërat argëtuese, i cili kaloi në lexim të parë në seancën plenare të Kuvendit. Përmes një video-mesazhi, Aliu bëri thirrje të veçantë duke deklaruar se varësia nga bixhozi përbën një rrezik serioz për shëndetin.
Sipas tij, nuk mund të flitet për bixhozin si një formë argëtimi kur ai shndërrohet në zakon dhe varësi të dëmshme. Aliu shtoi se ky problem hyn nëpër familje në formë të borxhit, stresit dhe shqetësimeve, ndërsa zë vend në mënyrë krejtësisht tinëzare në jetën e të rinjve ende pa u pjekur mirë.
Për këtë arsye, ministri mbështet masat ligjore që largojnë bastoret dhe kazinotë nga shkollat dhe ulin presionin e reklamave te të rinjtë. Ai e cilësoi këtë si një betejë për shëndetin mendor të fëmijëve dhe porositi se terapia më efektive kundër varësisë mbetet parandalimi dhe vendosja e kufijve.
Burim: Tetova Sot
— Redaksia ZHURMA
Bisedoni
Komentet janë të hapura për anëtarët e Zhurma. Llogaria është falas — krijo një ose hyr në llogarinë tënde për me e thanë mendimin.