Pse asnjë nxënës shqiptar nuk fitoi diplomën 'Pishtari' në Plavë?
Ceremonia e shpërblimit të gjysmëmaturantëve me sukses të shkëlqyer në shkollën 'Hajro Shahmanoviq' zbulon mungesën e nxënësve shqiptarë në listën e laureatëve.
PLAVË — Më 16 qershor 2026, në ambientin e qendrës mësimore të shkollës fillore „Hajro Shahmanoviq“ u zhvillua ceremonia solemne e dorëzimit të diplomës „Pishtari“ (Lluça) për shtatë gjysmëmaturantë që gjatë nëntë viteve të shkollimit kanë shfaqur sukses të shkëlqyer dhe sjellje shembullore. Nga 72 nxënës të pesë paraleleve, një prej të cilave me tetë nxënës me mësim në gjuhën shqipe, asnjë nga ata nuk u shpërblye.
Në ceremoni ishin të pranishëm drejtori Sellmir Purishiq dhe ndihmësdrejtoresha Minella Markishiq, kujdestarët e klasave: Samba Kandiq, Millena Vukaniq dhe Grujica Rajrogiq, si dhe kryetari i Komunës së Plavës, Nihad Canoviq, me bashkëpunëtorët – nënkryetaren Bellma Sharkinoviq dhe kryetarin e Kuvendit të Komunës, Allen Balliq. Canoviq falënderoi mësimdhënësit për përgatitjen e nxënësve, ndërsa prindërit u kërkuan të jenë krenarë për fëmijët e tyre.
Laureatët e diplomës „Pishtari“ janë: Imran Dreshkoviq, Allden Aksalliq, Demir Balliq, Dragutin Vukaniq, Ema Osmançeviq, Llejlla Purishiq dhe Esmira Canoviq. Me vendimin e kolektivit të mësimdhënësve, ata u shpërblyen me nga një libër. Përveç kësaj, Komuna e Plavës i shpërbleu me nga 100 euro, një libër dhe një bllok shënimi. Të gjithë deklaruan se do të vazhdojnë shkollimin në SHMP „Beqo Bashiq“ në Plavë.
Ceremonia përfshiu edhe ndarjen e fletëfalënderimeve për nxënësit që u dalluan në garën shtetërore të gjuhës angleze: Allden Aksalliq, Sarah Dina Gutiq dhe Llejlla Purishiq, si dhe mentores së tyre, profesoreshës së gjuhës angleze, Millena Vukaniq.
Shkolla „Hajro Shahmanoviq“ ka paralele të shpërndara në Brezojevicë, Bogajiq, Meteh, Vojno Sellë dhe Hot. Mungesa e nxënësve shqiptarë në listën e laureatëve të diplomës „Pishtari“ vë në dukje një problem struktural në arsimin e gjuhës amtare.
Kryetari Canoviq theksoi se diploma „Pishtari“ është reflektim i punës dhe përkushtimit të nxënësve. Por pyetja mbetet: pse asnjë nxënës nga paralelet shqipe nuk arriti të përfshihet në këtë listë, pavarësisht përpjekjeve të mësimdhënësve dhe prindërve?
Burim: Koha Javore
— Redaksia ZHURMA