Gashi: Në Kosovë s’ka perspektivë, po ju shkruaj nga Gjermania

Drilon Gashi, ish-këshilltar i Glauk Konjufcës gjatë periudhës kur ai ishte kryetar i Kuvendit, ka treguar përmes një shkrimi se po punon në ndërtim në Gjermani për shkak të mungesës së mundësive në Kosovë. Ai theksoi se nuk po shkruan për t'u viktimizuar, por për të ndarë një të vërtetë që shumë shqiptarë e jetojnë në heshtje.

Gjatë karrierës së tij, ai ka kaluar rreth 25 vjet duke studiuar teologji, filozofi dhe shkenca humane, ndërsa ka shërbyer edhe si imam dhe ka vazhduar studimet në Psikoterapi. Ai shtoi se është përpjekur të ndërtojë një jetë me dije e punë të ndershme, por sot në moshën 39-vjeçare punon në një vend ndërtimi duke vendosur pllaka dhe bartur kova.

Sipas Gashit, puna nuk e poshtëron njeriun, por atë e dërrmon një jetë e tërë përpjekjesh pa siguri dhe pa perspektivë. Ai bëri të ditur se ka konkurruar në rreth 60 vende pune në Kosovë, duke trokitur në dyer institucionesh, kompanish dhe njerëzish me ndikim, ku ka përjetuar refuzime dhe premtime të pambajtura.

Tutje, ai tregoi se ka punuar edhe për 500 deri në 600 euro në muaj, në kushte ku ndonjëherë mungonin edhe tualetet për punëtorët. Gashi pranoi se ka përgjegjësinë e tij për vendimet e marra, por shtoi se me katër fëmijë, detyrime bankare dhe përgjegjësi familjare, erdhi një ditë kur nuk mund të priste më.

Në mesazhin e tij drejtuar institucioneve, ai ngriti pyetje rreth përgjegjësisë ndaj qytetarëve, besueshmërisë së mundësive për punësim dhe mbrojtjes së të drejtave të punëtorëve. Gashi deklaroi se nuk kërkon punë pa meritë apo mëshirë, por kërkon që puna të vlejë dhe qytetari të mos ketë nevojë për ndërmjetës politik.

Ai përfundoi duke thurur vlerësim për dijen e fituar dhe duke theksuar se ende e do Kosovën, por dashuria ndaj atdheut nuk duhet të ndalojë thënien e të vërtetave që dhembin.