Protesta kalon te Drejtoria e Policisë pas shoqërimit të aktivistëve

Mbrëmjen e së mërkurës, një grup qytetarësh dhe studentësh kanë transferuar tubimin e tyre para godinës së Drejtorisë së Policisë së Tiranës. Ky veprim ka ardhur si reagim ndaj ndërhyrjes së forcave të rendit për marrjen me forcë të dy aktivistëve Edison Lika dhe Dritan Goxhaj. Ngjarja ka nisur fillimisht në zonën përballë Kryeministrisë, ku dy personat në fjalë janë ndaluar nga efektivët pasi kanë kundërshtuar marrjen e fletëve të gjobës.

Sipas qytetarëve, tubimi i zhvilluar në bulevard ka qenë i ligjshëm, pasi organizatorët kishin siguruar më parë lejen përkatëse nga institucionet. Megjithatë, ky qëndrim është hedhur poshtë nga uniformat blu, të cilat e kanë konsideruar tubimin të paligjshëm dhe kanë ndërhyrë për shoqërimin e dy aktivistëve. Të mbledhur para drejtorisë, protestuesit insistojnë në lirimin e menjëhershëm të Likës dhe Goxhajt.