Ndryshon procedura e kontrollit mjekësor për marrjen dhe rinovimin e patentës

Ndryshon procedura e kontrollit mjekësor për qytetarët që aplikojnë për marrjen ose rinovimin e lejes së drejtimit. Dokumentacioni shëndetësor do të plotësohet dhe njoftohet se do të nënshkruhet elektronikisht nga mjekët, ndërsa të dhënat do t’i kalojnë drejtpërdrejt Drejtorisë së Përgjithshme të Shërbimeve të Transportit Rrugor (DPSHTRR), ku qytetarët do ta marrin dokumentin përfundimtar nëpërmjet platformës e-Albania.

Ministria e Shëndetësisë dhe Mirëqenies Sociale ka miratuar udhëzimin nr. 644, datë 2 shtator 2026, i cili është publikuar në Fletoren Zyrtare të 4 nëntorit. Ky dokument përcakton rregullat e reja për kontrollin mjekësor të personave që kërkojnë të pajisen për herë të parë me leje drejtimi mjeti motorik, për ata që kërkojnë rinovimin e saj, si dhe për drejtuesit ekzistues që i nënshtrohen verifikimit të aftësive fizike dhe psikike.

Ndryshimi kryesor sipas udhëzimit lidhet me digjitalizimin e plotë të procesit të vlerësimit mjekësor. Procesi nis me kontrollin fizikisht në institucionin shëndetësor publik kompetent pranë mjekut të përgjithshëm ose mjekut të familjes, i cili pas verifikimit të pagesës dhe kartelës shëndetësore plotëson elektronikisht formularin e anamnezës. Udhëzimi specifikon se diagnozat e kaluara dhe të shëruara duhet të dallohen nga sëmundjet aktuale, ndërsa mungesa e informacionit në kartelën elektronike nuk konsiderohet automatikisht si provë e ekzistencës apo mungesës së një sëmundjeje. Pas këtij hapi, aplikanti referohet fizikisht te specialistët e shikimit dhe dëgjimit, të cilët kryejnë kontrollet përkatëse dhe nënshkruajnë certifikatën elektronike.

Në rastet kur mjekët konstatojnë probleme shëndetësore ose kur ekzistojnë dyshime për aftësinë psikofizike, aplikanti referohet te Komisioni Mjekësor. Udhëzimi përcakton se ky komision jep një nga tri vlerësimet e mundshme: i aftë për të drejtuar mjetin, i aftë me kufizime, ose i paaftë për drejtimin e mjetit, duke caktuar edhe afatin e vlefshmërisë apo kategoritë e lejes së drejtimit. Historiku i një sëmundjeje të kaluar dhe të shëruar nuk sjell automatikisht kufizim të afatit të vlefshmërisë.

Me vënien në funksion të sistemit të ri eliminohet nevoja për dorëzimin fizik të dokumenteve pranë DPSHTRR-së. Të dhënat dhe rezultatet e vlerësimit mjekësor do të shkëmbehen ndërmjet institucioneve shëndetësore dhe DPSHTRR-së nëpërmjet Platformës Qeveritare të Ndërveprimit, në bashkëpunim me Agjencinë Kombëtare të Shoqërisë së Informacionit (AKSHI), ku edhe do të bëhet ruajtja e arkivimi i dokumenteve elektronike.