Protesta e 56-të kundër qeverisë: Qytetarët kërkojnë dorëheqjen e Ramës
Protestuesit marshuan pranë Komisariatit nr. 3, kërkojnë lirimin e të ndaluarve
TIRANË — Pas marshimit në rrugët e Tiranës mbrëmjen e sotme, protestuesit marshuan edhe pranë Komisariatit nr. 3, ku bënë thirrje për lirimin e të ndaluarve nga protesta që u mbajt para Parlamentit. Në këtë mënyrë është mbyllur edhe protesta e 56-të radhazi kundër qeverisë.
Qytetarët përsëritën kërkesën për dorëheqjen e kryeministrit Edi Rama dhe largimin e qeverisë. Gjatë marshimit u dëgjuan thirrje si “Shqipëri e re”, “Rama jepe dorëheqjen”, “Qeveri e krimit”, ndërsa protestuesit deklaruan se nuk do të ndalin tubimet deri në përmbushjen e kërkesave të tyre.
Pjesëmarrësit i drejtuan gjithashtu thirrje Prokurorisë së Posaçme (SPAK), duke kërkuar hetimin e kryeministrit Edi Rama dhe lirimin e personave të ndaluar gjatë protestave. Organizatorët kanë bërë të ditur se protestat do të vijojnë edhe në ditët në vazhdim, duke këmbëngulur se nuk do të tërhiqen deri në realizimin e kërkesave të tyre politike.
Burim: Almakos — Redaksia ZHURMA