Prokuroria Speciale falënderon SHBA-në për hetimet kundër krimit transnacional

Kryeprokurori i Prokurorisë Speciale të Republikës së Kosovës, Blerim Isufaj, priti në një takim pune të ngarkuarën me punë në ambasadën e Shteteve të Bashkuara të Amerikës në Prishtinë, Anu Prattipati. Në qendër të bisedimeve ishin puna e Prokurorisë Speciale dhe sundimi i ligjit në Kosovë.

Prokuroria Speciale falënderoi Prattipatin dhe ambasadën amerikane për mbështetjen në hetimet e suksesshme kundër organizatave kriminale që merren me krim transnacional. Ajo vlerësoi edhe bashkëpunimin me agjencitë ligjzbatuese amerikane në luftën kundër krimit të organizuar transnacional.

Po ashtu, Prokuroria Speciale shprehu mirënjohje për ambasadën e SHBA-së për mbështetjen e vazhdueshme në ruajtjen e plotë të pavarësisë së Prokurorisë Speciale dhe të sistemit të drejtësisë në përgjithësi.