Policia në kërkim të të dyshuarit për vrasjen e Arlinda Zekajt

I dyshuari për vrasjen e Arlinda Zekajt ndodhet ende në arrati, ndërsa Policia e Kosovës ka njoftuar për ngjarjen e rëndë që ndodhi në fshatin Vitomiricë të Pejës. Stacioni Policor në Pejë ishte njoftuar rreth orës 19:00 për një rast të dhunës në familje, ku viktima ishte shoqëruar dhe intervistuar në stacion. Bashkëshorti i saj ishte arrestuar, intervistuar dhe ndaluar për 48 orë, ndërsa viktima ishte kthyer me vullnetin e saj në shtëpi. Rreth orës 21:10, policia është njoftuar se gruaja është gjetur pa shenja jete, kurse të dhënat e para tregojnë se vdekja është shkaktuar nga goditjet me një mjet të fortë. Si i dyshuar për këtë rast është identifikuar kunati i viktimës, i cili po kërkohet nga organet e rendit. Për rastin është njoftuar Prokurori i Shtetit, i cili ka dalë në vendin e ngjarjes.