Prokuroria konfirmon shqyrtimin e parashtresës së Arlinda Zekajt para vrasjes

Prokuroria Themelore në Pejë ka konfirmuar se më 22 tetor pranoi një parashtresë nga Arlinda Zekaj, e cila kërkonte veprime urgjente ndaj zyrtarëve dhe ngrinte shqetësime për mospërmbushje të detyrave gjatë trajtimit të rasteve të saj. Pasi pranoi kërkesën, Kryeprokurorja urdhëroi regjistrimin e saj për t'u trajtuar nga prokurori kompetent në drejtim të veprës penale të keqpërdorimit të pozitës apo autoritetit zyrtar.

Parashtresa iu përcjell për trajtim urgjent edhe Drejtorisë Rajonale të Policisë në Pejë, Gjykatës Themelore, Drejtorisë për Mirëqenie Sociale dhe Qendrës për Punë Sociale, për të verifikuar lëshimet eventuale të zyrtarëve. Ndërkohë, lidhur me vendimin gjyqësor për shfrytëzimin e barabartë të shtëpisë, Prokuroria njoftoi se ekzekutimi i tij ishte mundësuar nga prokurorja kujdestare në bashkëpunim me Policinë e Kosovës.

Rasti ndërkaq ka marrë vëmendje të madhe pas publikimit të letrës që viktima e kishte drejtuar para se të vritej mbrëmjen e së dielës, më 25 tetor, në Vitomiricë të Pejës. Për vrasjen e saj dyshohet kunati i saj, Albert Sylaj, i cili sipas raportimeve dyshohet se e goditi me sëpatë, pasi ajo ishte kthyer në shtëpi nga një patrullë policore pas denoncimit për dhunë në familje.