Kompania Zekaj Tours shpreh pikëllimin e thellë për vrasjen e Arlinda Zekajt

Kompania Zekaj Tours ka shprehur pikëllimin e thellë për vrasjen e Arlinda Zekajt, e cila ishte pjesë e stafit të kësaj kompanie për dy vite. Përmes një mesazhi ngushëllimi të publikuar në rrjetet sociale, ajo është kujtuar si një person i sjellshëm, i respektueshëm dhe me zemër të bardhë.

Në telegramin e ngushëllimit, kompania thekson se gjatë kohës sa punoi atje, Arlinda la kujtime të mira dhe fitoi respektin e kolegëve, të cilët do ta kujtojnë gjithmonë si pjesë të çmuar të familjes së tyre profesionale. «Është e rëndë dhe e dhimbshme kur një jetë e re ndërpritet në mënyrë kaq tragjike», thuhet në mesazh.

Zekaj Tours u ka shprehur ngushëllimet më të sinqerta familjes, të afërmve dhe të gjithë atyre që e njohën dhe e deshën atë. Gjithashtu, kompania ka theksuar nevojën për drejtësi, duke kërkuar që rrethanat e ngjarjes të marrin përgjigjet e duhura. «U prehsh në paqe, Arlinda! Drejtësia duhet të flasë dhe një jetë e humbur kërkon përgjigje», shtohet në njoftim.